Úkimet • 29 Sáýir, 2019

Tasqynǵa tosqyn ýaqtyly qoıyldy

Keshe Úkimette ótken baspasóz konferensııasynda Ishki ister mınıstriniń orynbasary Iýrıı Ilın eldegi sý tasqyny qateriniń aldyn alý boıynsha atqarylǵan jumystardyń nátıjelerin aıtyp berdi.

Suńǵat ÁLIPBAI

Sý tasqyny boıynsha jaǵdaı bıyl Jol kartasynda kórsetilgen keshendi sharalardy iske asyrýdyń arqasynda oıdaǵydaı ótti. Bul sharalar 2020 jyly aıaqtalady. Jergilikti atqarýshy organdar soǵan saı profılaktıkalyq jumystar júrgizdi. Qaraǵandy, Aqmola oblystarynda aýqymdy jumys atqaryldy. Ras, keıbir jekemenshik aýmaqtar sý astynda qalǵan bolatyn. Ol jerlerde arnaıy qyzmetter shuǵyl sharalar qabyldady», – dedi Iý.Ilın.

Soltústik Qazaqstan oblysynda 21 sáýirde Esil ózeni deńgeıiniń kóterilýi saldarynan «Chelıabınsk-Novosıbırsk» respýblıkalyq mańyzy bar avtojolynyń ústimen sý júrdi. Zarechnyı kentindegi (Petropavl qalasynyń aýmaǵynda) turǵyn úılerge qaýiptengen joq. Shúlbi sý qoımasynan josparly sý aǵyzylýyna baılanysty Pavlodar oblysy baqylaýǵa alyndy.

Onyń aıtýynsha, ótken jylmen salystyrǵanda, bıyl jaǵdaı turaqty, qandaı da bir qıyndyq bolǵan joq. Tek naýryz aıynyń sońy men sáýir aıynyń basynda Aqmola oblysynda ǵana turaqsyz jaǵdaı oryn alǵan edi. Jedel túrde turǵyndar qaýipsiz jerge kóshirildi, sý soryp shyǵaryldy. Qıraǵan jáne apatty jaǵdaıda turǵan úıler tirkelmepti.

Aıta keteıik, sý tasqyny kezeńi bastalǵanǵa deıin TJD jergilikti atqarýshy organdarmen birlesip sharalar keshenin qolǵa alǵan. 11 myń shaqyrym aryqtar men arnalardy tazalaý jumystary júrgizildi. Eldi mekenderden 12 mln tekshe metr qar shyǵaryldy. Avtomobıl joldarynda 33 myń, temirjoldarda 7 myń sý ótkizý qurylystary tazartyldy. Sý tasqynynyń aldyn alý jáne saldaryn joıý úshin 10 myń tonna janar-jaǵarmaı, 281 myń tonna ınertti materıal, 1 mln qap pen 40 tonna jarylǵysh zattar qory daıyndaldy.

Sonymen qosa, mınıstrdiń orynbasary jyl saıyn sý tasqyny qaýipsizdigin saqtaýǵa qatysty halyqtyń belsendiligi artyp kele jatqanyn jetkizdi.

Tótenshe jaǵdaı aýmaǵynda qalýy múmkin halyqty aldyn ala qulaqtandyrǵan bizdiń bólimshelerdiń jumysy nátıje berdi. О́ıtkeni adamdardyń kóbi qaterdi sezinip, baspanasyn sý tasqynynan qorǵaýǵa jáne shuǵyl evakýasııaǵa ázirleý sharalaryn qabyldaıdy. Olar evakýasııa jaǵdaıynda alý úshin asa qajetti zattardy – qujattaryn, aqshalaryn aldyn ala daıyndap qoıady turǵyndardyń qaı jerde jınalatynyn biledi, – dedi ol.

Iý.Ilınniń pikirinshe, turǵyndardyń belsendiligi adam shyǵynyna jol bermeýge, turǵyndardy shuǵyl evakýasııalaýǵa múmkindik jasaıdy.

Bıylǵy 18 naýryzdan bastap IIM bólimsheleri tasqynǵa qarsy jedel shtabtardyń jumysy kúsheıtildi. Apattyq-qutqarý jumystar men shuǵyl jumystarǵa 1000-nan astam adam men 300-ge jýyq tehnıka jumyldyryldy.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz