Rasııa arqyly Evrazııa kóshesindegi 54-úıdiń shatyrynda qyz bala ózine qol jumsamaq bolǵan habardy estisimen, sol mańda kezekshilikte júrgen polısııa qyzmetkerleri oqıǵa ornyna asyqty. Kún eńkeıip, qarańǵylyq túse bastaǵan shaq edi. Atalǵan kópqabatty úıdiń kólbeý shatyrynyń erneýinde otyrǵan qyz balaǵa aldymen jetken Nurbolat ony áńgimege tartyp, aldarqata otyryp, janyna jetip, qolynan ustaı aldy.
- Boıjetken kez kelgen ýaqytta sekirip ketýi múmkin edi. Oılanýǵa, qutqarýshylar brıgadasyn shaqyrýǵa ýaqyt tapshy boldy. Sondyqtan bizdiń qyzmetkerler óz ómirin qaterge tigip, kómekke asyqty, - deıdi Batys Qazaqstan oblystyq Polısııa departamentiniń baspasóz qyzmetiniń ókili Álııa Naýryzǵalıeva.
Shynymen de sol kúni maıda jaýyn jaýyp, shatyr beti dymqyl, syrǵanaq bolatyn. Qyzdy qutqarmaq bolǵan polısııa qyzmetkerleriniń ózi de bıikten qulap ketýi múmkin edi. Abyroı bolǵanda bári sátimen aıaqtaldy.
Oral qalalyq polısııa basqarmasy Abaı bóliminde sýısıd áreketi boıynsha oqıǵany resmı tirkep, tergeý jumysyn bastady. Tıisti mamandarmen áńgimeleskennen keıin boıjetkendi týystary alyp ketipti. Bul oqıǵadan áleýmettik jeli arqyly habardar bolǵan kópshilik jedel de saýatty áreket etken qos polısııa qyzmetkerin marapattaýdy usynyp jatyr.
