«Basty maqsatymyz – saıası naýqannyń zań talaptaryna saı ótýin qamtamasyz etý. 11 mamyrdan bastalatyn saılaýaldy úgit-nasıhat jumystaryna belsene kirisetin bolamyz. Kandıdatty qoldaýǵa 10 myńnan astam qol jınalyp, 26 sáýirde aıaqtalǵanyn aıta ketkim keledi» deıdi respýblıkalyq saıası uıymnan prezıdenttikke úmitker Qasym-Jomart Toqaevty qoldaý jónindegi qoǵamdyq shtabtyń jetekshisi Vladımır Býbenko.
Onyń aıtýynsha, "Nur Otan" partııasy qalalyq, aýdandyq fılıaldarynyń senimdi ókilderi qajetti ázirlikterden ótken. Shtabtyń quramyna oblystyń qurmetti azamaty Qudaıbergen Qalıev, «Zenchenko jáne K» komandıttik seriktestiginiń bas dırektory, oblystyq máslıhattyń depýtaty Gennadıı Zenchenko, partııa ardageri Ivan Chırkalın, kásipqoı bokstan álem chempıony Janat Jaqııanov sekildi tanymal tulǵalar tartylǵan. Barlyǵy 200-den astam belsendi jumyldyrylǵan. Sáýirdiń 15 men maýsymnyń 7 aralyǵyn qamtıtyn keshendi jumys kestesi túzilip, eńbek ujymdarymen kezdesýler, túrli aksııalar men forýmdar ótkizý belgilengen. 1300-den astam nurotandyq saılaýaldy úgit-nasıhat júrgizý sharalaryna aralasyp, barlyq saılaý ýchaskesine baratyn bolady.
Búginde oblysta 600-den asa saılaý ýchaskesi qurylǵan.
О́ńir jurtshylyǵyna aldaǵy saılaý barysyn qoǵamdyq qadaǵalaýǵa negizdelgen «Amanat» azamattyq tuǵyrnamasy da tanystyryldy. Arnaıy top músheleri eńbek ujymdarynda kezdesýler ótkizip, quqyq, ádildik pen ashyqtyqty qamtamasyz etý, yntymaqtastyq jáne daıyndyq sharalaryn ortaǵa saldy.
«Amanat» - qazaqstandyqtardyń táýelsiz erikti birlestigi sanalady. Saılaýdyń negizgi bes baǵyty boıynsha monıtorıng júrgiziledi. Básekelestiktiń teń bolýy, eshkimge artyqshylyq berilmeýi, aqparattardyń, saılaý ýchaskeleriniń qoljetimdiligi basty nazarǵa alynady» deıdi «Qyzyljar» bilim ortalyǵynyń jetekshisi Janat Muhamedjanov.
