Bul kúni shahardyń bas kóshesinde «Batyrlarǵa taǵzym – Bessmertnyı polk» uranymen ótken sherýge myńdaǵan adam qatysty. Juban Moldaǵalıev gúlzarynan Máńgilik alaýǵa deıin soǵys jyldarynyń ánderin shyrqap ótken turǵyndar qoldaryna maıdangerlerdiń sýretin ustaǵan.
Jeńis meıramyna arnalǵan saltanatty sharaǵa Oral qalasyndaǵy 5517 áskerı bólim jaýyngerleri de qatysty. Jedel qımyl batalonynyń 200-deı sarbazy Qazaqstan Respýblıkasynyń Memlekettik Týyn jáne jeńis týynyń kóshirmesin saltanatpen alyp ótti. Bul topty áskerı bólim komandıriniń orynbasary maıor Mels Dýlatbaev bastap júrdi.
Máńgilik alaý basynda bolǵan saltanatty jıynda Batys Qazaqstan oblysynyń ákimi Altaı Kólginov jeńimpaz aǵa urpaqqa arnap sóz sóıledi.
– Búgin Uly Jeńistiń 74-inshi jylyn atap ótýdemiz. Bul meıramdy ardaqty ardagerlerimiz ben tyl eńbekkerleri bizben birge qarsy alýda. Beıbit kúnimizdiń qadirin olardan artyq kim biledi?! Bul meıramnyń qadir-qasıetin keleshek urpaqqa amanat etý – bizdiń paryzymyz. О́ıtkeni, Uly Jeńis ata-babalarymyzdyń eren erligi men esil eńbeginiń arqasynda keldi. Elbasymyz Nursultan Ábishuly Nazarbaev «Ekinshi dúnıejúzilik soǵys týraly bizdiń jáne búkil TMD halyqtarynyń Uly Otan soǵysynda jeńip shyǵýy úshin qandaı uly qurbandyqtarǵa barǵany árbir jańa býyndy tárbıeleýdiń taqyryby bolýy kerek» dep atap kórsetti. Táýelsizdik jyldarynda qol jetken jetistikterdiń barlyǵy Uly Jeńistiń jemisti jalǵasy. 1941-1945 jyldar aralyǵynda Uly Otan soǵysyna Aq Jaıyq óńirinen 80 myńǵa jýyq azamat attandy. Qan maıdanda erliktiń ǵajap úlgisin kórsetken olardyń jartysy ǵana elge oraldy. Batysqazaqstandyq 43 azamat Sovet Odaǵynyń Batyry ataǵyn ıelendi. Alty jerlesimiz Dańq ordeniniń tolyq kavaleri atandy. Eńbektegen baladan eńkeıgen qarııaǵa deıin «Barlyǵy maıdan úshin, barlyǵy Jeńis úshin» dep eńbek etti. Aq Jaıyq turǵyndary da maıdan shebine jyly kıimderi men azyq-túlik, qarý-jaraq jiberdi. Bizdiń óńirimizde kúndiz-túni jeti áskerı gospıtal jumys istedi. Surapyl jyldarda elge adal qyzmet etýdiń úlgisin kórsetken atalarymyz ben ájelerimizdiń erligi qashan da el esinde. Aǵa býynnyń ardaqty isin keıingi urpaq laıyqty tabystarmen jalǵastyrady degen nyq senim bar. Osy turǵyda Jeńistiń qadir-qasıeti kúnnen-kúnge artyp, mazmuny tereńdeı túspek. Elimizdiń uıytqysy ári jas urpaqtyń aqylshysy bolyp otyrǵan ardagerlerdiń erligin qurmetteý – barshamyzdyń ortaq mindetimiz, – dedi óńir basshysy.
Bul kúni merekelik sharalar oblys ortalyǵynyń ár jerinde ótti. Mánshúk, Álııa jáne Hıýaz beınelengen «Qazaq halqynyń dańqty qyzdary» atty eskertkish keshenge, Baýyrlastar zıratyna, Sovet Odaǵynyń batyry Temir Masınniń eskertkishine, Máńgilik alaý keshenindegi maıdangerler tizimine gúl shoqtary qoıyldy. Oral qalalyq ortalyq saıabaǵynda «Soldat botqasy» daıyndalyp, ardagerlerge syı-qurmet kórsetildi.
Sýretti túsirgen Temirbolat TOQMÁMBETOV
Batys Qazaqstan
