Búginde Áıteke bı kentinde eki qabatty 12 turǵyn úı qurylysy, 250 oryndyq aýdandyq aýrýhana, 600 oryndyq mádenıet úıi men basqa da áleýmettik nysandar salynady dep josparlanyp otyr. Sondaı-aq, bul aýmaqta aldaǵy ýaqytta 24 kásipkerlik nysan boı kóterip, avtomobıl joly qaıta jańartylady. Qazirdiń ózinde kópqabatty 6 turǵyn úıdiń qurylysy júrgizilip jatyr.
Qazir Qazaly aýdanynyń ortalyǵy Áıteke bı kentinde jalpy quny 889,7 mln. teńge bolatyn Mekemeler úıiniń qurylysy bastalynyp ketti. Atalǵan jobany iske asyrý bir ǵımaratta ákimdik pen aýdandyq bólimderdi shoǵyrlandyrýǵa múmkindik beredi. Olar qazirgi ýaqytta eldimekenniń ár aýmaǵynda ornalasqan.
- Qazir aýdandyq ákimdik pen bólimder bólek ǵımarattarda ornalasqan, bul ásirese turǵyndar úshin óte qolaısyz. Onyń ústine, qazirgi aýdan ákimdigi ǵımaratynyń irgetasy 1963 jyly qalanǵan bolatyn. Elý jyldan astam ýaqyt bolǵan nysan búginde eskirgen. Jańa aýdan ortalyǵynyń josparyna sáıkes, oblystyq mekemeler úıiniń, halyqqa qyzmet kórsetý ortalyǵynyń, mektepter men aýrýhanalardyń, sondaı-aq, sot pen mádenıet úıleriniń ǵımarattary halyqqa yńǵaıly bolý úshin bir-birine jaqyn ornalastyrylady. Aýdanda sońǵy eki jylda ınfraqurylymdyq jáne basqa da nysandardyń qurylysy qarqyndy júrgizilýde. Sebebi, Qazaly aýdany ınfraqurylymmen az qamtylǵan aýdandardyń biri bolyp tabylady,-deıdi qurylys, sáýlet jáne qala qurylysy basqarmasynyń basshysy Muhamedısa Álserikov.
Aýdanda jol qurylysy men jóndeý jumystaryna basymdyq berilgen. Sebebi bul - Qazaly aýdanyndaǵy eń ózekti máselelerdiń biri sanalady.
