Balalar ǵımarattardyń pishini ózgeshe bola alatyny, aýada nemese sýda ornalasa alatyny, keńistikte qozǵala alatyny týraly habardar boldy. Eń bastysy, zamanaýı sáýlettiń ekologııany saqtaýǵa baǵyttalatynyn túsindi. Úıler jer qýatynyń esebinen jylytylyp, jaryqtandyrylýymen qatar, dızaınynda jasyl kóshetterge arnalǵan keńistikti de qamtýy múmkin.
«Men balalarǵa ekoqalalar turǵyzý úshin qajetti jańa kásipter jaıly áńgimeledim. Bizdiń qalalar kógaldandyrýdy qajet etedi. Qazaqstanda tapsyrys berýshilerge ekoúıler usynatyn mamandar bar. Alaıda, bastapqy quny boıynsha ekoqurylystar qymbat bolǵandyqtan adamdar odan bas jıi tartady. Alaıda ekologııalylyq shyǵyndardyń orny jyldam tolady. Búgingi tyńdaýshylardyń arasynda bolashaq ekoýrbanıst bar shyǵar. Balalar sáýlet jáne dızaın jaıly áńgimeni úlken qyzyǵýshylyqpen tyńdady», deıdi Eldar Hasanov.
Balalar úıindegi erekshe kezdesýge kelgen sáýletshini Henkel kompanııasy shaqyrdy. Bul kompanııa «Qazaqstandy Jasyldandyrýǵa Qatys» naýqanynyń sheńberinde Qazaqstanda aǵash otyrǵyzýdy qatarynan besinshi jyl júrgizip keledi. Naýqan kezinde Almaty, Nur-Sultan, Pavlodar jáne Taraz qalalarynda shamamen eki myń aǵash otyrǵyzyldy. Bıylǵy jyly taǵy 185 kóshet otyrǵyzylady.
«Jyl saıyn biz tek kóshet qana otyrǵyzyp qoımaı, balalarǵa arnalǵan bilim berý baǵdarlamalaryn ótkizemiz. Bul joly biz balalar úıiniń tárbıelenýshileri úshin eko-kvest uıymdastyrdyq. Sáýletshiniń áńgimesimen shabyttanǵan balalar qaǵazdan, plastılınnen jáne qolda bar basqa zattardan jasalǵan ekoúıler men ekokóliktiń óz nusqalaryn usyndy. Sharanyń sońynda biz birlesip 35 kóshet otyrǵyzdyq», dedi «Henkel» kompanııasynyń satylymdar bóliminiń jetekshisi Gleb Abdýllın.
Aıtqandaı, balalar úıiniń tárbıelenýshisi Alına Gýdzeeva ánshi bolýdy armandaıdy. Eger armany oryndalsa, ekologııalyq naýqandardy ótkizýge ózi muryndyq bolatynyna senimdi.
«Maǵan bolashaq úıleri óte unady. Olar kádimgi ǵımarattardaı emes ári ekologııaǵa múldem zııan keltirmeıdi. Eger tanymal ánshi bolsam, ekologııany qoldaýǵa baǵyttalǵan sharalarǵa qatysýǵa tyrysatyn bolamyn», deıdi kishkentaı Alına.
Oraıy kelip turǵanda, №1 oblystyq balalar úıinde jıyrma úsh úıirme bar ekenin, olardyń on segizin volonterler júrgizetindigin aıta ketken jón.
