Elimizdegi eń alǵashqy jel elektr stansasynyń jobasy Ereımen aýdanynda júzege asyrylǵanyn aıta keteıik. Qazir oblysta balama energııa kózderin damytýda birneshe joba júzege asyrylyp jatyr. Ereımennen bastaý alǵan jaqsy jańalyq Selınograd aýdanynda jalǵasyn taýyp, Arshaly aýdanyna qarasty Bulaqsaı aýyldyq okrýginde de qolǵa alyna bastady. Stansanyń árqaısysy 50 MVt elektr qýatyn óndiretin eki bóligi bıyl jáne 2020 jyly iske qosylady dep otyr.
Jel elektr stansasyn tolyq paıdalanýǵa bergende aýaǵa parnık gazdardyń bólinýi jylyna 230 myń tonnaǵa azaıady. Stansanyń ózi 10 myńnan astam otbasynyń elektr qýatyna degen qajetin ótep, ony óndirýge jumsalatyn shyǵyndy birneshe ese azaıtýǵa múmkindik berýge tıis. Jergilikti mamandardyń biliktiligin kóterý shetelde iske asyrylmaqshy.
«VetroInvest Kokshetaý» JShS Kókshetaý qalasynyń irgesindegi Krasnoıar aýyldyq okrýginiń aýmaǵynda irge tepken. Jel elektr stansasy «NEG Mison» kompanııasynyń bes generatorynan turady. Sóz arasynda bul qurylǵylar álemdegi elektrmen jabdyqtaýshy qurylǵylar arasynda eń senimdisi bolyp esepteletinin aıta ketken lázim. Astana qalasynda ótken EHRO halyqaralyq kórmesine osy úlgi qoıylǵan bolatyn. Jel elektr stansasynyń qýaty 3,5 MVt jasyl energııa óndirýge jetedi. Máselen, oqyrmannyń kóz aldyna elestetý úshin 12300 turǵyny bar Krasnoıar aýylyna 2 MVt ábden jetkilikti ekenin aıta ketelik.
– Jel energııasynyń ekologııalyq jáne ekonomıkalyq artyqshylyqtary kóp, – deıdi qurylys ýchaskesiniń basshysy Ashat Jaqsybergenov. – Halyqqa óte tıimdi jobany ústimizdegi jyldyń mamyr aıynda tolyq aıaqtap, elektr qýatyn bere bastaımyz. Jobanyń quny 1,7 mıllıard teńgeni quraıdy.
Ýchaske basshysynyń aıtýyna qaraǵanda, jel elektr stansasy salynatyn jer aldyn ala muqııat zerttelgen eken. Bul jerde qys aılarynda jel qýaty kúshti, jazda sál-pál azaıýy múmkin. Biraq odan eshqandaı qaýip joq. О́ıtkeni generatorlarda jeldi kúnderi jınaqtalatyn elektr qýatyn jınaıtyn qurylǵy bar.
Jaqsy jańalyq el qulaǵyn eleń etkizip, úmittendirip otyr.
– Eń bastysy, halyqqa tıimdi bolýy, – deıdi Krasnoıar aýyldyq okrýginiń ákimi Nurlan Aısın. – Selolyq okrýgte áleýmettik jaǵynan az qamtylǵan kóptegen otbasy bar. Onyń ústine shaǵyn jáne orta bıznes ókilderine de elektr qýatynyń arzan bolǵany tıimdi. Buryn-sońdy bolmaǵan jaqsy jańalyq qarapaıym halyq úshin tıimdi bolǵany durys qoı.
Stansanyń aýyl shetinde ornalasý sebebi de mamandardyń aıtýyna qaraǵanda, belgili bir talaptarǵa sáıkes eken. Máselen, qalaqshalardyń úzdiksiz aınalyp turýy tym qatty bolmaǵanymen, báribir dybys shyǵarady. Sondyqtan da jel qondyrǵylary bir-birimen munara bıiktigimen salystyrǵanda on ese qashyqtyqta ornalasýy tıis. Onyń ústine bul mańda eshqandaı ǵımarat, orman bolmaýǵa tıisti. Ádette ashyq landshaftaǵy tóbe, taý jotalaryna jel elektr stansalaryn ornatý tıimdi bolyp esepteledi. Krasnoıar aýylynyń irgesindegi jańa stansanyń qonysy da tym bıik bolmaǵanymen, ózge óńirden bıikteý, qoıanjondanyp jatqan jota ispetti. Jel qondyrǵysyn ornatý úshin oryn izdegen mamandar osy jerde soǵatyn jeldiń ortasha jyldamdyǵyn aldyn ala eseptegen.
Jańa joba iske asyrylǵan kezde qazirgi on shaqty jumys orny saqtalady, oǵan qosa elektr energııasy birshama arzandaıdy. Jyl saıyn qymbattaıtyn elektr qýatynyń aqysynan ábden zárezap bolǵan turǵyndar jańa jobaǵa úmitpen qarap otyr.
Aqmola oblysy
