Kezdesý barysynda qos tarap aǵymdaǵy jyldyń 14-22 qyrkúıegi aralyǵynda Nur-Sultanda ótetin kúres túrlerinen álem chempıonatyna daıyndyq kezeńin talqylady. Atalǵan syn Tokıo Olımpıadasyna lısenzııa taratady. Jarys qorytyndysy boıynsha 1-den 6-shy oryn aralyǵynda ornalasqan balýandar tórtjyldyq dodasyna tikeleı joldama almaq. Olımpıada qarsańyndaǵy mańyzdy dodaǵa álemniń myńǵa jýyq balýany qatysady dep kútilýde. О́tken jylǵy álem chempıonatyna 850 sportshy qatysqanyn aıta ketý kerek. UWW prezıdenti Qazaqstan astanasyndaǵy álem chempıonaty joǵary deńgeıde ótetinine senim bildirdi.
«Qazaqstanda dástúrli kúres mektebi bar. Bul balalar men jastar arasynda keń taralǵan buqaralyq sport túrleriniń biri. Bizdiń elimizde kúres túrlerinen Akademııa jumys isteýde. Mundaǵy tárbıelenýshiler Qazaqstan namysyn halyqaralyq arenada qorǵap júr. Iri sporttyq jarystardy ótkizý tájirıbemiz mol, sondyqtan, elordada álem chempıonatyn joǵary deńgeıde uıymdastyrýǵa bar kúshimizdi salamyz. Osy oraıda, Olımpıada oıyndarynyń qarsańynda mundaı iri sporttyq oqıǵany ótkizýdi bizge senip tapsyrǵany úshin Birikken kúres álemine alǵysymdy bildiremin», - dedi Tımýr Qulybaev.
Kezdesý barysynda taraptar Qazaqstan UOK pen UWW arasyndaǵy áriptestik máselesin, sondaı-aq, elimizdegi erkin, áıelder jáne grek-rım kúresiniń damý qarqynyn talqylady. Bıylǵy jyldyń 4-8 shildesi aralyǵynda Nur-Sultanda kadetter arasyndaǵy Azııa chempıonaty ótedi. Sondaı-aq, Qazaqstan Azııa aımaqtyq irikteý týrnırin ótkizýden de úmitti. Nur-Sultandaǵy álem chempıonatynda joldamadan ala almaǵan balýandardyń atalǵan synda lısenzııany ıelenýine múmkindik beriledi. Týrnırde birinshi jáne ekinshi oryn ıemdengen sportshylar úshin Olımpıadaǵa jol ashylmaq.
Budan bólek, kezdesýde Qazaq Kuresi Halyqaralyq federasııasyn UWW qataryna qosý máselesi oń sheshimin tapty. Aıta ketelik, 2017 jyly qurylǵan Qazaq Kuresi Halyqaralyq federasııasyn Qanat Bozymbaev basqarady. Búginde federasııa quramyna 29 memleket engen. Sondaı-aq, Qazaq Kuresi federasııasy elimizdegi olımpıadalyq sport túrleri men atalǵan ulttyq sport túrin damytýdy qolǵa alǵan Sporttyq jekpe-jek jáne kúsh qoldanylatyn sport túrleri Konfederasııasynyń múshesi sanalady.
