Tabıǵattyń tamyljyǵan dıdaryna kireýke túskeli, at tuıaǵy jetetin jerdegi qoǵaly kólder qorysqa aınalǵaly qashan?.. Osynshama kóldiń 328-inde ǵana balyq óristeıdi. Qalǵany taıyzdanyp, laılanǵan. Kópshiligi tabıǵatty aıaýdy bilmeıtin bezbúırektikten. Máselen, oblys ortalyǵynan taıaqtastam jerdegi Shaǵalaly sý qoımasy jaz boıy qala turǵyndarynyń sýǵa túsip masaırap, qara qarǵanyń mıy qaınaıtyn ystyqta jandary saıa taýyp shomylyp, balyq aýlaıtyn jeri. Negizinen bul jerden oblys ortalyǵynyń turǵyndary sý iship otyr. Áıtse de, ereje ataýlyny esinen shyǵaryp, kólik jýatyndar da, ıtterin shomyldyratyndar da kezdesedi.
Tazalyqtyń jóni osy bolsa, sý qoımasyndaǵy balyqqa keletin qaýip-qater de adam qolymen jasalyp otyr. Máselen, áýesqoı balyqshylar baqylaýshylardyń kózderin ala berip, qulash-qulash qytaı aýlarymen súzedi. Qoryqshynyń kózine túsip qalyp, qashyp júrgende aýlaryn da tastap ketedi eken. Oblystyq orman sharýashylyǵy jáne janýarlar dúnıesi aýmaqtyq ınspeksııasy ókilderi osylaı dep otyr.
Taıaýda «Taza sý qoımalary» aksııasy bastaldy. Bul sharýa bir aı boıy júrgizilmekshi. Tabıǵat janashyrlary eń aldymen izgilikti isin Shaǵalaly sý qoımasynan bastady.
– Mundaı aksııany jyl saıyn júrgizemiz. Qala turǵyndaryna da ózderi ıgiligin kórip otyrǵan tabıǵatty kúte bilýi keregin aıtyp jatyrmyz,–deıdi orman sharýashylyǵy jáne janýarlar dúnıesi bóliminiń jetekshisi Murat Shalabaı, – kúzge deıin jaǵalaý kúl-qoqysqa, ydys-aıaqqa tolyp ketedi.
Jaǵalaýǵa ár 500 metr saıyn qoqys jáshigin ornatqan. Aıyna eki ret tazartyp turady. Sýda qalǵan aýdy jınastyrýdyń da amalyn tapqan. Motorly qaıyqqa sý ishindegi aýlardy ilip alatyn arnaıy qurylǵy ornatylypty. Uzaq ýaqyt sý ishinde turyp irip-shirigen aýlardy jaǵalaýǵa shyǵaryp, órtep jiberedi eken.
Shaǵalaly sý qoımasyn tazartyp bolǵan soń Sileti men Astana sý qoımalarynda da dál osyndaı aksııa qolǵa alynbaq.
Aqmola oblysy
