Halyqaralyq qatynastar fakýltetiniń dekany Saǵynǵalı Aıdarbaev búgingi kúni elimizde birneshe tilde qatar tikeleı aýdarma jasaıtyn mamandar tapshy ekendigin aıtady. Professor oqý oshaǵynynda shymyldyǵyn túrgen atalmysh ortalyqtan shyńdalyp shyqqan áleýetti aýdarmashylar osy olqylyqtyń ornyn toltyrsa degen tilegin jetkizdi.
«Basty maqsatymyz – Qazaqstanda dıplomatııalyq aýdarmashylar mektebin qalyptastyrý. Bul baǵyttaǵy jumystarǵa ýnıversıtet basshysy akademık Ǵalym Mutanov bastamashy bolyp otyr. Shákirtterimiz BUU-nyń barlyq tilderin qazaqshaǵa jáne kerisinshe qazaqshany atalmysh tilderge tikeleı aýdaratyn ozyq maman bolsa deımiz», deıdi Saǵynǵalı Aıdarbaev.
Ortalyqtyń ashylý rásimine arnaıy kelgen Shveısarııanyń Qazaqstandaǵy tótenshe jáne ókiletti elshisi Ýrs Shmıd, eki el arasyndaǵy saýda-ekonomıkalyq áriptestik baılanystar jyl ótken saıyn óristep kele jatqanyn málimdedi.
«Eýropa elderiniń ishinde Shveısarııa Qazaqstanǵa ınvestısııa quıýshy memleketterdiń arasynda úshinshi orynda. Qos memleket arasyndaǵy yntymaqtastyq qarym-qatynastar da joǵary mánge ıe. Bul mektepten shyqqan bolashaq aýdarmashylar osy baılanystardyń odan ári órbýine sep bolatyn kadrlarǵa aınalatynyna senemin. Shveısarııadaǵy Jeneva aýdarma mektebi bul salanyń kóshbasshylarynyń biri ekenin bilesizder. Osy oraıda eki el stýdentteriniń ózara tájirıbe almasý isine de qoldaý kórsetýge daıynbyz», – deıdi Shveısarııa elshisi Ýrs Shmıd.
Halyqaralyq qatynastar fakýltetinde tórt birdeı mamandyqqa fransýz tilinde sabaq beriledi. Basqa da álem tilderi maman daıarlaý isinde qoldanylady. Jýyrda ǵana bilim oshaǵynyń ustazdary fransýz, aǵylshyn, orys, tilderindegi dıplomatııalyq termınderdi qamtyǵan aýdarma kitabyn qurastyryp shyǵarǵan. Oqýlyq avtory, Dıplomatııalyq aýdarma kafedrasynyń meńgerýshisi Almash Seıdıkenova atalǵan eńbek til mamandary úshin úlken kómek quraly bolatynyn, bul baǵyttardaǵy izdenister áli de jalǵasyn tabatynyn jetkizdi.
