Barshamyzdyń maqsatymyz ortaq deıdi Aıagóz qalasynyń turǵyny Gúlnara Salıbaeva
Sársenbi, 24 sáýir 2013 2:31
Aıagóz aýdandyq qazynashylyq memlekettik mekemesi basqarmasynyń bastyǵy Gúlnara Nyǵmetollaqyzymen oıda joq jerde kezdestik. Ol óz ujymymen birge «Qozy Kórpesh – Baıan sulý» Mádenıet úıinde ótip jatqan «Meıirim» aksııasyna qatysýǵa kelipti. 700 oryndyq ǵımarat ishi halyqqa lyq toly. Aıagózdegi jetim balalardy aıalaýǵa arnalǵan aksııada mekemeler men sharýa qojalyqtarynyń ıeleri qaıyrymdylyq tanytyp, qoldan kelgen kómekterin jasady.
Sársenbi, 24 sáýir 2013 2:31
Aıagóz aýdandyq qazynashylyq memlekettik mekemesi basqarmasynyń bastyǵy Gúlnara Nyǵmetollaqyzymen oıda joq jerde kezdestik. Ol óz ujymymen birge «Qozy Kórpesh – Baıan sulý» Mádenıet úıinde ótip jatqan «Meıirim» aksııasyna qatysýǵa kelipti. 700 oryndyq ǵımarat ishi halyqqa lyq toly. Aıagózdegi jetim balalardy aıalaýǵa arnalǵan aksııada mekemeler men sharýa qojalyqtarynyń ıeleri qaıyrymdylyq tanytyp, qoldan kelgen kómekterin jasady. Tipti «Aıagóz jol PCh-42» mekemesiniń bastyǵy Ǵazez Muqajanov márttik tanytyp, jetimderge eki bólmeli eki páterdi salyp beretinin aıtty. Al Gúlnara qaryndasymyz da bul qaıyrymdylyq sharasynan tys qalmaı, ujymmen birge qomaqty kómek jasady.
Qaıyrymdylyq sharasy aıaqtalǵan soń Gúlnara Nyǵmetollaqyzymen áńgimelesýdiń sáti tústi. Janymyzda Aıagóz aýdany ákimdiginiń ishki saıasat bóliminiń bastyǵy Roza Qaıyrbaeva bar.
Aıagóz aýdanynda 70 myńnan astam adam turady. Mundaǵy jergilikti turǵyndardyń deni qazaqtar. G.Salıbaeva osyndaǵy №1 orys mektebin támamdaǵan soń, Almatydaǵy nesıe berý-esep tehnıkýmyna oqýǵa túsedi. Bala kezinen ózi unatatyn osynaý oqý ornyn oıdaǵydaı aıaqtaǵan ol qyzmet ete júrip bilimin odan ári jalǵastyrýdy maqsat tutady.Aqyry talapty qyz arman qala Almatydaǵy halyq sharýashylyǵy ınstıtýtynyń stýdenti atanady. Ony aıaqtaǵan soń Aıagózge oralady.
Uıǵyr jigiti Ǵabdýlqaıym Salıbaev ekeýi birin biri unatyp, turmys qurady. Qazir altyn asyqtaı eki balalary bar. Uly Nıǵmet Demırel ýnıversıtetin úzdik bitirgen, qazir Almatydaǵy iri kompanııada dırektor. Al qyzdary Fırýza 7-synypta oqıdy, qurbylary arasynda syıly, oqýda ozat.
– Minezi salmaqty, ujymynda zor bedelge ıe Gúlnara Nyǵmetollaqyzynyń atqaryp otyrǵan jumysy búkil aýdannyń tynys-tirshiligimen tikeleı baılanysty, – deıdi aýdan ákiminiń orynbasary Seıilbek Ysqaqov. – Aýdan boıynsha 96 mekeme bar ekenin eskersek, búkil qarjylyq operasııalar osy jerden ótedi. Ujymda 20 adam eńbek etedi. Barlyǵy bilikti de bilimdi kadrlar. Onyń ústine, qazaq tiliniń maıyn tamyzatyn, maqal-máteldi jatqa soǵatyn G.Salıbaeva memlekettik tildiń órkendeýine de óz úlesin qosyp kele jatqan isker de ónegeli jan.
Mekeme Naýryz, basqa da memlekettik meıramdardyń mándi de mazmundy ótýine nazar aýdarady. Onyń ústine qazynashylyq mekeme túrli sharalarǵa qatysyp, qoldan kelgen kómekterin jasaıdy.
– Qazaqtarmen qoıan-qoltyq aralasyp, týystarsha syılasyp kettik, – deıdi Gúlnara Nyǵmetollaqyzy. – Kórshilerim Baıan jáne Mádına apaılarǵa degen qurmetim erekshe. Qazaq kórshisi dese qoń etin kesip berýden taıynbaıtyn jomart halyq qoı. Tyǵyz aralasyp, bir-birimizdi mereke kúnderi quttyqtap jatamyz. Mádenıet úıi janynan qurylǵan Qazaqstan halqy Assambleıasynyń bóliminde tóraıym bola júrip, Aıagózdegi basqa ult ókilderiniń basyn biriktirýde de biraz sharalardy atqardyq. Aýdandaǵy halyqtyń 98 paıyzy qazaqtar, qalǵan 2 paıyzy basqa ult ókilderi. Aýdan ákimi Ánýarbek Muhtarhanov aǵamyzǵa alǵysymyzdy aıtamyz, ýaqyty tapshy bolsa da, bizben kezdesip, kómegin jasap turady.
G.Salıbaevanyń aıtýynsha, aýdan ekonomıkasy ósip keledi. Aýdandaǵy bıýdjettiń oryndalýyn, qarjyny utymdy da orny-ornymen paıdalanýdy baqylaıtyn mekemeni basqarǵan soń kiris-shyǵys nazarda bolýy kerek, deıdi ol. Bıyl «Qazaqmys» korporasııasy Aqtoǵaı ken-baıytý kombınatynyń qurylysyn bastady. Oǵan 750 mıllıon AQSh dollary bólindi. 2015-jyldary alyp kásiporyn iske qosylǵan soń aýdannyń 1500-2000 adamy jumyspen qamtamasyz etilmek. Altyn óndiretin kenish paıdalanýǵa beriletin merzim de alys emes. Aıagózde ótken jyly birneshe mektep, balabaqshalar iske qosyldy. Aýdan ekonomıkasynyń órkendeýi adamdardyń erteńgi kúnge degen senimderin arttyra túsken.
– Qazaqtarmen kórshi bolǵanyma qýanamyn. Olar dostyq pen tatýlyqqa adal. Qonaq kelse, tórin usynady. Kúıeýim uıǵyr, ózim tatar bolsam da birde-bir ret ógeısitkenderin kórgen emespiz. Qaıta baýyrlaryna tartyp, qushaqtaryn jaıady. Endeshe, elimizdiń gúldenýine úles qosý – barlyǵymyzdyń maqsatymyz, – dep júrekjardy lebizin bildirdi Gúlnara Nyǵmetollaqyzy.
Ońdasyn ELÝBAI,
«Egemen Qazaqstan».
Shyǵys Qazaqstan oblysy,
Aıagóz aýdany.
