Foto: parlam.kz
Konstıtýsııalyq reforma jónindegi komıssııanyń kezekti otyrysynda Ata zań jobasyn qoldaý jónindegi ustanymy men dáıekterin Jalpyulttyq sosıal-demokratııalyq partııasynyń tóraǵasy Ashat Rahymjanov málimdedi.
Ol Konstıtýsııa jobasy, eń aldymen ádildikke, teńdikke, quqyqtardy qorǵaýǵa jáne memlekettiń halyq aldyndaǵy jaýapkershiligin arttyrýǵa baǵyttalǵanyn atap ótti.
Sergeı Ponomarev: Jańa Konstıtýsııa Qazaqstandaǵy qoǵamdyq kelisim men birlikti nyǵaıtady
«Qoǵamdyq birlestikterdiń qyzmet etý erkindigin bekitý jáne azamattardyń qoǵamdyq ómirge qatysý aıasyn keńeıtý – naǵyz azamattyq qoǵamdy damytýǵa jol ashady. Mundaı qoǵamda kásipodaqtar, qoǵamdyq uıymdar men bastamashyl toptar eńbek adamdarynyń, jastardyń jáne áleýmettik osal sanattaǵy azamattardyń múddelerin erkin qorǵaı alady. Bul teń múmkindikter men memlekettiń áleýmettik jaýapkershiligi qaǵıdattarymen tikeleı baılanysty», dedi JSDP tóraǵasy.
Sonymen qatar Ashat Rahymjanov osynaý konstıtýsııalyq normalar adam múddesine baǵdarlanǵan ornyqty saıasattyń negizin qalyptastyrý úshin mańyzdy ekenin jetkizdi.
Magerram Magerramov Konstıtýsııa jobasyn referendýmǵa shyǵarýdy usyndy
«Memlekettik sheshimder qabyldanǵanda bolashaq urpaqtyń múddesi mindetti túrde eskerilýi kerek. Ásirese eńbek, jumyspen qamtý, ekologııa jáne áleýmettik qorǵaý salalarynda bul óte mańyzdy. Osyǵan baılanysty usynylyp otyrǵan konstıtýsııalyq normalar turaqty ári adam múddesin basty orynǵa qoıatyn saıasattyń negizin qalyptastyrady», dedi komıssııa múshesi.
Aıta keteıik, búgin Qasym-Jomart Toqaev Konstıtýsııalyq komıssııa tóraǵasy – Konstıtýsııalyq sot tóraǵasy Elvıra Ázimovany, Konstıtýsııalyq komıssııa tóraǵasynyń orynbasary – Memlekettik keńesshi Erlan Qarındi jáne Konstıtýsııalyq komıssııa múshesi – Prezıdenttiń quqyqtyq máseleler jónindegi kómekshisi Erjan Jıenbaevty qabyldady. Qabyldaýda Prezıdent jaqynda respýblıkalyq referendým ótkizý týraly Jarlyqqa qol qoıatynyn málimdedi.
