«Baqyttyń baǵasyn bilińder»

Seısenbi, 30 sáýir 2013 2:25

Keshe L.N.Gýmılev atyndaǵy Eýrazııa ulttyq ýnıversıtetinde «Qazaqstan Respýblıkasynyń Prezıdenti Nursultan Nazarbaevtyń Qazaqstan halqy Assambleıasynyń HH sessııasynda sóılegen sózinen týyndaıtyn stýdentter aktıvi aldyndaǵy mindetter» taqyryby boıynsha ǵylymı praktıkalyq konferensııa ótti.

Seısenbi, 30 sáýir 2013 2:25

Keshe L.N.Gýmılev atyndaǵy Eýrazııa ulttyq ýnıversıtetinde «Qazaqstan Respýblıkasynyń Prezıdenti Nursultan Nazarbaevtyń Qazaqstan halqy Assambleıasynyń HH sessııasynda sóılegen sózinen týyndaıtyn stýdentter aktıvi aldyndaǵy mindetter» taqyryby boıynsha ǵylymı praktıkalyq konferensııa ótti.

Konferensııada L.N.Gýmılev atyndaǵy EUÝ janyndaǵy Etnos­aralyq qatynastar jáne toleranttylyq ortalyǵynyń dırektory Sataı Syzdyqov, L.N.Gýmılev atyndaǵy EUÝ-diń prorektory Dıhan Qamzabekuly, osy ýnıversıtettiń kafedra meńgerýshisi, fılologııa ǵy­lym­darynyń doktory, professor Myrzataı Joldasbekov, Qa­zaqstan halqy Assambleıasy Hat­shylyǵynyń sarapshysy Edil Ospan jáne EUÝ Áleýmettik jáne azamattyq departamentiniń dırektory Erkebulan Nuǵma­nov stýdentter aldynda stýdent jastardyń boıynda tole­rant­tylyq qalyptastyrý máse­leleri, Qazaqstan halqy As­sam­bleıasynyń 2020 jylǵa deıin­gi damýy jáne el birligin qalyptastyrýdaǵy róli týraly, qalyptasqan memlekettiń jańa saıası baǵytyndaǵy jastar­dyń alatyn orny jóninde keleli oı tolǵamdary men pikirlerin ortaǵa saldy.

Aldymen osy jıyndy júr­gizgen Sataı Syzdyqov sóz alyp, bul konferensııanyń maqsaty jaıly qysqasha toqtalyp ótti. Onyń aıtýynsha, Qazaqstan halqy Assambleıasynyń jaqynda ótken sessııasynda sóılegen sózinde Elbasy Nursultan Nazarbaev Assambleıa aldynda turǵan negizgi mindetterdi aıqyndap berdi. Sol mindetterdiń ishinde qazaqstandyq jastarǵa arnalǵan máseleler de bar. «Sizder stýdentter belsendileri retinde sol mindetterdi jastar qaýymyna jetkizedi degen senimdemiz, – dedi Sataı Syzdyqov. – О́ıtkeni, Qazaqstanda turatyn ózge etnos­tar qazaq ultynyń mańaıyna toptasyp otyr».

Budan keıin sóz alǵan Myrza­taı Joldasbekovtiń elimizdiń ótkeni men búgini jóninde naqty mysaldar keltire otyryp aıt­qan­dary stýdent jastardy beı-jaı qaldyrmady. «Sizder óte bir baqytty zamanda ómir súrip júrsińder, – dep bastady ǵalym sózin. – Myna bizder oıynnyń qy­zyǵyna endi túsip kele jatqan kezimizde Uly Otan soǵysy bas­taldy. Aýyldaǵy tepse temir úze­tin azamattardyń barlyǵy maı­danǵa attandy. Elde egilip, kem­pir-shaldar men áıelder qaldy».

Osylaı degen Myrzataı Jol­dasbekov sol kezdegi qıynshy­lyq­ty kóz aldymyzǵa elestetetin mynadaı bir oqıǵany aıtyp berdi. «Ińkáshaı degen jeńeshem bizdiń aýylǵa kelin bolyp tústi, – dedi professor ótkendi eske alyp. – Ertesinde Rysbek degen kúıeýi soǵysqa attandy. Aýyl­daǵylar alǵashynda posh­ta kelgende, hat-habar keldi dep poshta tasýshynyń aldynan qýana júgirip shyǵatyn edi. Keıin ýaqyt óte poshta tasýshy kelse, odan qashatyn boldy. Qashatyn sebebi, soǵysta júrgenderden «qara qaǵaz» kelip qaldy ma dep qorqatyn, úreılenetin. Sodan Ińkáshaı jeńeshemniń kúıeýi, bizdiń aǵamyz Rysbek habarsyz ketti. Jeńeshem budan keıin turmysqa shyqpady. Eki kempirdi baǵyp-qaǵyp, 100-den asyp baryp qaıtys boldy».

Myrzataı Joldasbekov bul estelik retindegi oqıǵany aıtyp otyrǵanynyń sebebin stýdent jastarǵa túsindirip ótti. «Aralaryńda táýelsizdikpen qurdas, táýelsizdik alǵan jyldardan keıin týǵan balalar bar. Táýelsizdik – senderdiń baqytyń! Biz mektepte oqyǵan kezde jón­di sabaq beretin muǵalimder tym az edi. Qaǵaz, qalam, kitap jetis­peı­tin. Al qazir barlyǵy bar. Mektep oqýshylarynyń ózi noýt­býk arqalap júr… Keńester Oda­ǵynyń quramynda bolǵan 74 jyldyń ishinde bizdiń tarıhymyz taptaldy… Búgingi táýelsizdigimizdi qazaqtyń nebir mar­qasqalary kóre almady, jete almaı ketti. Al oǵan myna sizder jettińizder. Qazaqtyń tarıhyn, mádenıetin, eldiń tutastyǵyn qorǵaý endi senderdiń mindetteriń!» dedi ol.

Osylaısha, jastarǵa úlken oı salatyn ulaǵatty sózder aıtqan ǵalym odan soń Qazaqstan halqy Assambleıasynyń eldiń yntymaǵy men birligin nyǵaıtýdaǵy ró­li­ne toqtaldy. Myrzataı Jol­das­bekovtiń atap ótýinshe, Qazaq­stan halqy Assambleıasy ınstı­týty álemdegi eshbir elde joq. Ol – shaǵyn Birikken ulttar assambleıasy sııaqty qurylym. «Prezıdenttiń erekshe batyrly­ǵy­na, tapqyrlyǵyna tańǵalamyn, – dep jalǵastyrdy sózin ol. – Nursultan Nazarbaev Qazaqstandy búkil álemge tanytty, álemge moıyndatty. Búgin elimiz álemniń tórine shyqty. Baqyttyń baǵasyn bilińder. Osy baqyt senderdiń bastaryńnan taımasyn!».

Kópti kórgen saıasatker ári qo­ǵam qaıratkeri sózin bylaı qo­rytyndylady: «Men osy ýnıversıtette rektor bolyp júrgende, Aqbulaq ózeninen ótetin kópir janyndaǵy avtoturaq bos tura­tyn, – dedi ol. – Al qazir sol avto­turaqta mashına tolyp tur, ma­shına qoıatyn oryn joq onda. Stý­dentter de mashına minip júr».

«Jasyratyny joq, Táýel­siz­diktiń máni men mańyzyn jas­tar kóp bile bermeıdi, – dedi kelesi kezekte sóz alǵan Dı­han Qamzabekuly. – Búginde jastarǵa eń aldymen bilim, otan­shyldyq kerek. Qazaqstan halqy Assambleıasynyń ses­sııa­syndaǵy Elbasynyń sóı­le­gen sózi «Qazaqstan-2050» Strategııasynda aıtylǵan oılarmen sabaqtasyp jatyr. Pre­zıdent sol strategııasynda jas­tar­dyń bolashaǵy týraly keremet oılar aıtty. «Eger qazaq tili óz dárejesinde qoldanylsa, eger otanshyldyq sezimimiz báseńdemese, biz Qazaq memleketi bolamyz» dedi Memleket basshysy».

Prorektordyń atap ótýinshe, Qazaq memleketi bolý sizder men bizderge baılanysty. Al Assambleıa Elbasy atap ótkendeı, Qazaqstanda turyp jatqan 17 mıllıon halyq. Osyǵan oraı mynadaı mysal keltirdi: «Osydan tórt-bes jyl buryn Bashqurtstannyń bir ǵalymy bizdiń ýnıversıtetke kelip, maǵan jolyqqan edi, – dedi Dıhan Qamzabekuly. – Áńgime barysynda ol «Bizdiń bir-aq armanymyz bar. Bizdiń jastarymyzdyń armany – táýelsizdik. Ony qashan alatynymyz belgisiz. Biz soǵan qol jetkizý úshin ómir boıy kúresemiz» degen bolatyn».

Budan soń ol táýelsizdiktiń qadir-qasıetine, Assambleıanyń etnostar arasyndaǵy birlikti nyǵaıtýdaǵy alatyn ornyna toqtalyp, belsendi stýdent jas­tardy Elbasynyń Qazaqstan halqy Assambleıasynda sóılegen sózinen týyndaıtyn mindetterdi jastar arasynda keńinen nasıhattaýǵa shaqyrdy.

Al Edil Ospan Qazaqstan halqy Assambleıasynyń 2020 jylǵa deıingi damýy jáne el birligin qalyptastyrýdaǵy jastardyń róline qatysty oı-pikirin ortaǵa saldy. Onyń aıtýynsha, Assambleıanyń 20 sessııasy barysynda Elbasymyz keńinen toqtalǵan máseleniń biri sessııa qarsańynda Pre­zı­dent Jarlyǵymen bekitil­gen Qazaqstan halqy Assam­bleıasynyń 2020 jylǵa deıingi damý tujyrymdamasy boldy. Tujyrymdamanyń maqsaty – Assambleıa ınstıtýtyn damytý jáne onyń eldiń táýelsizdigi men memlekettiligin nyǵaıtýdaǵy rólin arttyrý, patrıotızm, qazaq halqy men memlekettik tildiń toptastyrýshy rólin arqaý ete otyryp jalpy qundylyqtar negizinde qoǵamdyq kelisim men ulttyq birlikti qamtamasyz etý bolyp tabylady.

«Tujyrymdama memlekettik etnosaıasatty júzege asyrýǵa, ult­tyq birlikti qalyptastyrýǵa, qoǵamdyq kelisim men turaq­ty­lyqty qamtamasyz etýge, etnosaralyq qatynastar sala­syn­daǵy memlekettik jáne aza­mattyq ınstıtýttardyń ózara is-qımylyn jandandyrýǵa qol jetkizýge, onyń ishinde, eń aldymen, Assambleıa ınstıtýty­ arqyly qol jetkizýge baǵyt­tal­ǵan. Tujyrymdamany iske asyrý nátıjesinde keleshekte Assambleıa etnosaralyq jáne qoǵamdyq kelisimdi qamtamasyz etý tetigi bolyp qana qoımaı, konstıtýsııalyq organ retinde azamattyq qoǵam ınstıtýttary úshin únqatysý alańyna, jalpy ulttyq mańyzy bar máseleler boıynsha azamattyq yntymaqtastyqtyń tetigine aınalady dep kútilýde», – dedi Edil Ospan.

Konferensııada, sondaı-aq, atalǵan ýnıversıtettiń Áleýmettik jáne azamattyq departamentiniń dırektory Erkebulan Nuǵmanov ta jastar týraly óziniń oı-pikirin ortaǵa saldy.

Álısultan QULANBAI,

«Egemen Qazaqstan».

———————————-

Sýretti túsirgen

Erlan OMAROV.