Qazaqstan delegasııasyn QR SIM Konsýldyq qyzmet departamentiniń dırektory Taýboldy Úmbetbaev, al mońǵol tarapyn - Mońǵolııa Syrtqy qatynastar mınıstrligi Konsýldyq qyzmet departamentiniń dırektory Lhanaajavyn Mýnhtýshıg basqardy. Is-sharaǵa sondaı-aq eki eldiń bas prokýratýra, ishki ister, ádilet, eńbek jáne áleýmettik qorǵaý jáne bilim mınıstrlikteriniń ókilderi qatysty.
Konsýltasııalar barysynda taraptar eki eldiń zańdy jáne jeke tulǵalarynyń quqyqtary men múddelerin qorǵaý, Qazaqstan men Mońǵolııa aýmaqtaryna eki el azamattarynyń kirý/shyǵý jáne bolý tártibi, azamattardy áleýmettik qorǵaý, eki eldiń ádilet mınıstrlikteri arasyndaǵy yntymaqtastyq, esirtki qylmysyna qarsy kúres, sondaı-aq Mońǵolııanyń Baıan-Úlgıı aımaǵynda Qazaqstannyń konsýldyq mekemesin ashý jáne basqa máselelerdi talqylady.
Buǵan qosa, taraptar eki eldiń úkimetteri arasyndaǵy Mońǵolııa aýmaǵynda turaqty turatyn Qazaqstan azamattarynyń jáne QR aýmaǵynda turaqty turatyn Mońǵolııa azamattarynyń azamattyqty jeńildetilgen tártippen alýy jáne toqtatýy, azamattyǵy joqty jáne qos azamattyq jaǵdaılaryna jol bermeý týraly kelisimniń, sondaı-aq, 1993 jylǵy 22 qazanda jasalǵan Qazaqstan men Mońǵolııa arasyndaǵy azamattyq jáne qylmystyq ister boıynsha ózara quqyqtyq kómek kórsetý Shartqa ózgerister engizý týraly Hattamanyń jobalaryn talqylady.
Konsýldyq konsýltasııalar syndarly jaǵdaıda jáne ózara túsinýshilik rýhynda ótti.
