Muhıt asyp, aqsha shashpaı-aq…
Senbi, 18 mamyr 2013 2:33
Almatyda 84 jastaǵy jannyń omyrtqasyna ota jasaldy
Sońǵy ýaqytta Ońtústik Koreıadaǵy myqty klınıka mamandarynyń Qazaqstanǵa jıi joly túsetini baıqalady. Munyń birqatar sebepteri bar. Birinshiden, bul el qazir bizdiń elimizdiń medısına salasyn damytýǵa memlekettik turǵyda kóńil bólip, halyqqa emdelý úshin kvota bóletinin biledi. Oǵan qosa eki eldiń keıbir emdeý mekemeleri eki jaqqa da tıimdi áriptestikke qol jetkizip, tájirıbe almasyp júrgen jaıy bar.
Senbi, 18 mamyr 2013 2:33
Almatyda 84 jastaǵy jannyń omyrtqasyna ota jasaldy
Sońǵy ýaqytta Ońtústik Koreıadaǵy myqty klınıka mamandarynyń Qazaqstanǵa jıi joly túsetini baıqalady. Munyń birqatar sebepteri bar. Birinshiden, bul el qazir bizdiń elimizdiń medısına salasyn damytýǵa memlekettik turǵyda kóńil bólip, halyqqa emdelý úshin kvota bóletinin biledi. Oǵan qosa eki eldiń keıbir emdeý mekemeleri eki jaqqa da tıimdi áriptestikke qol jetkizip, tájirıbe almasyp júrgen jaıy bar.
Mundaı iske muryndyq bolyp otyrǵan oqıǵanyń biri – Almatydaǵy QR Prezıdenti Is Basqarmasynyń medısınalyq ortalyǵynyń Ortalyq klınıkalyq aýrýhanasy men ońtústikkoreıalyq vertebrologııalyq klınıkasy arasynda 2011 jyly ózara memorandýmǵa qoı qoıylǵan eken. Sol jyly mundaǵy Hırýrgııalyq ortalyqtyń negizin qalaǵan Nurtas Qazybaev pen burynǵy bas dáriger Vıacheslav Dýdnık álemdegi aldyńǵy qatarly klınıkalarmen jumys isteýge bastamashy bolady.
Sol kezde marqum Nurtas Kákimjanuly Qazaqstanda az zaqym keltiretin operasııalar jasaý úshin ekijaqty kelisimshartqa qajetti qujattardy rásimdeý, baılanystardy jolǵa qoıý, qural-jabdyqtar satyp alý sııaqty máselelerdiń bárin ózi retteıdi. Nátıjesi kóz aldymyzda. Sońǵy úsh jylda qazaqstandyq dárigerler Ońtústik Koreıaǵa baryp, tájirıbe baıytyp júrse, ońtústikkoreıalyq neırohırýrgter de bizge kelip, aǵzaǵa barynsha az zaqym keltiretin operasııalar jasap ketip júr.
Almatydaǵy bilgir dárigerlerdiń biri Vladımır Balkovoı joǵarydaǵy kelisimshartqa qol jetkizgennen keıin ózderiniń mundaı operasııalarǵa qajetti medısınalyq qural-jabdyqtar satyp alǵanyn aıtady.
– Máselen, buryn osteohondrozǵa nemese omyrtqasy zaqymdanǵan naýqastarǵa 50-60 jastan keıin operasııa jasaýǵa sırek táýekelge baratyn bolsaq, búgingi tańda biz jasy kelgen pasıentterge de kún saıyn operasııa jasaımyz, – deıdi bizdiń dárigerler.
Demek, qazaqstandyq mamandar aǵzaǵa zaqymy az operasııalardy júrgizýge mashyqtanyp aldy dese de bolady. Degenmen, taıaý kúnderi Ońtústik Koreıa dárigerleri Qazaqstandaǵy áriptesterimen birigip, sheberlik dárisi syndy kúrdeli otalardy júzege asyrdy. Bul joly hırýrg Lım Don Hvan myrzanyń jetekshiligimen Almatyda alty birdeı naýqasqa, alǵashqylardyń biri bolyp 84 jastaǵy ájeıdiń omyrtqa jaryǵyna operasııa jasaldy. Aıtqandaı, mundaı operasııanyń quny 200 myń teńge bolady eken.
Sonymen mamandardyń aıtýynsha, sońǵy ýaqytta osteohondroz aýrýyna baılanysty dertterdiń túri jasaryp keledi. Qazir, mundaı keselden zardap shegip júrgenderdiń orta jasy – 40.
Dárigerler Jer betindegi tirshilik keshken adamdardyń 90 paıyzynyń ómirde bir ret bolsa da omyrtqasy syzdamaıtyny joq deıdi. Buryn omyrtqa jáne býyn aýrýlarymen jasy kelgender syrqattanady degen túsinik bolsa, órkenıetti ómir salty bul túsinikti túbegeıli ózgertken. Qazir keńselerde otyrǵan 20-30 jastaǵy qyzmetkerler bul dertke jıi shaldyǵatyn boldy. Oǵan aýyr jumyspen aınalysatyn adamdardy, qurylysta densaýlyǵyna kúsh túsirip alǵan jandardy, basqa da kenetten bolatyn sebepterdi qossaq, bul kúnde beli shoıyrylyp, omyrtqa men býyn aýrýlarynan zardap shegip júrgender az emes. Sol sııaqty kóp qımyldamaıtyn adamdar omyrtqa aýrýlaryna jıi shaldyǵatynyna qaramastan, derti asqynǵansha júrip alady. Naýqastardyń birqatary operasııa jasatýdan qashqaqtaıdy.
Qazirgi qalyptasqan osy jaǵdaıǵa qarap otyryp, sońǵy kezde medısınanyń bul salasynda da ozyq izdenister paıda bolǵanyn, sonyń ishinde Ońtústik Koreıa dárigerleri omyrtqa jáne býyn aýrýlarynyń kóptegen túrlerin hırýrgııalyq operasııalarsyz-aq (ınvazıvti emes), túrli ádistermen emdeýge qol jetkizgen. Sonymen, Ońtústik Koreıadaǵy vertebrologııalyq klınıkamen ózara yntymaqtastyqty ulǵaıtý úshin qolǵa alynǵan sharalardyń aıasynda Almatyda qatarynan úsh kún, 14-17 mamyr aralyǵynda omyrtqa aýrýlaryna kúrdeli operasııalar jasaldy.
Onyń ishinde bel, moıyn omyrtqalaryna teńdesi joq mıkrohırýrgııalyq jáne endoskopııalyq qural-jabdyqtardyń kómegimen ota jasalyp, zamanaýı plastıkalyq materıaldardy qoldana otyryp, zaqymdanǵan nemese ábden jaramsyz kúıge jetken omyrtqa shemirshekteri aýystyryldy. Eń bastysy qan shyǵarylmaı jáne aýyrtpaı jasalynatyn mundaı operasııalardan keıin adam tez ońalady. Uzaq tósek tartyp jatpaıdy. Aýrýdyń zardabynan joǵalǵan omyrtqa qyzmetin qalpyna keltirý úshin ıntensıvti túrde em-dom sharalary júrgiziledi.
Almatylyq dárigerler eń ozyq tehnologııalarmen ota jasaýdy Ońtústik Koreıadan kelgen áriptesteriniń arqasynda meńgerip alǵanyn aıtsa, Almatyda kezekti ret ota jasaǵan hırýrg Lım Don Hvan qazir qazaqstandyq mamandar omyrtqa jaryǵyn emdeýge ábden mashyqtanyp aldy, zamanaýı tehnologııalardy tıisinshe meńgerdi deıdi.
– Ońtústik Koreıa men Izraıl burynnan qoldanyp kele jatqan amerıkalyq ádispen biz de jumys isteı bastadyq. Qazir Qazaqstandaǵy jasalynyp jatqan mundaı otadan keıin derttiń qaıtalanýy men asqynýy kádimgi operasııalarǵa qaraǵanda óte sırek kezdesedi, – deıdi Vladımır Balkovoı.
Máselen, az zaqym keltiretin ádispen elimizde tek ótken jyly 60 naýqasqa ota jasalynǵan. Bizdiń dárigerlerimizdiń qazir mundaı metodıkany keńinen engizýge múmkindik beretin joǵary tehnologııalyq medısınalyq qural-jabdyqtary bar.
Ne desek te, kezinde aıyqpastaı bolyp kóringen aýrýlar, ózimizde jasalmastaı bolǵan kúrdeli operasııalar bizdiń aq halatty abzal jandarymyzǵa baǵyndy. Janyn dert mazalaǵan adamdar muhıt asyp, aqsha shashpaı-aq óz elimizde emdelip, osylaısha el qataryna qosylyp jatqany qandaı qýanyshty.
Aınash ESALI,
«Egemen Qazaqstan».
ALMATY.
