Ertis ózeni jaǵasyndaǵy ortalyq jaǵalaýdyń tómengi bóliginde boı kótergen «Ertis Promenade» sahnasy tańqalarlyq.
Úlken keń LED-ekrany ilinip, jaǵajaı sahnasy jaryq shashatyn túrli ıllıýmınasııalarmen bezendirilgen. Osy jerde jaz boıy apta saıyn otandyq jáne sheteldik ánshiler án salady.
Bıylǵy jazǵy maýsymynyń ashylýyna jerles ánshiler Merýert Túsipbaeva, Roza Muqataeva, Rınat Malsagov jáne Damıra Majıtovalar keldi. Kópshiliktiń súıip tyńdaıtyn ánderin shyrqap, jaqsy kóńil-kúı syılady.
Turǵyndar oblystyq mádenıet, arhıvter jáne qujattama basqarmasynyń resmı saıtyndaǵy saýalnama arqyly «Ertis Promenade» jobasyna shaqyrylatyn juldyzdy usynyp, óz tańdaýlaryn da jasaı alady.
Jaǵalaýda sý burqaqtar jarysa tógiledi, jaryqshamdar jarqyraıdy. Gúlzarlar kózdiń jaýyn alady. Abattandyrylǵan Ertis jaǵalaýynyń uzyndyǵy endi jyl saıyn qosylyp, 7 shaqyrymǵa sozylady.
Qala ákimdiginiń málimetinshe, jaǵalaýdaǵy jóndeý jumystary demeýshilerdiń qarajaty esebinen júrgizilýde. Baspaldaqtarǵa jınalmaly oryndyqtar qoıylǵan.
Uıaly telefondy qýattaý quraldary, tegin symsyz ǵalamtor júıesi úshin balamaly energııa kózderi iske qosylǵan.
Ashyq aspan astyndaǵy dámhanalar úshin alańdar qurylyp, satylar retke keltirilidi, oryndyqtar jasaldy.
Jaǵalaýdyń landshaftyq arhıtektýralyq keıpin jaqsartý úshin jańa qorshaý qoıylyp, retro úlgisindegi qalqan bólshekteri ornatylypty.
Endi retro stılindegi dámhana ashylyp, jaǵalaý sánin keltirmek.
Qazir erekshe jasalǵan «ChaıkoFFskıı» shaǵyn kafesinde kofe men sháı balmuzdaq, sýsyndar satylady.
Sýretti túsirgen: Valerıı Býgaev
