«Búgin Shymkent qalasynda alǵashqy Belsendi uzaq ómir súrý ortalyǵynyń saltanatty ashylýyna qatystym. Ortalyq zamanaýı tulǵaǵa qajetti barlyq jaǵdaımen qamtamasyz etilgen. Internet-kafe, emdik-ýqalaý, fızıkalyq-emdeý bólmesi, kınozal, kitaphana, trenajerlyq zal, ıoga, ústel tennısi, bılıard aımaqtarymen jáne balalarǵa arnap jabdyqtalǵan oıyn bólmelerimen qamtylǵan. Bul ortalyqtyń bir ereksheligi - munda tek qarııalar ǵana emes, sonymen birge ómirdiń tálkegine ushyraǵan jetim búldirshinderimiz de arnaıy kelip, ata-áje meıirimi men qamqorlyǵyna bólenýge múmkindik alady. Qarttarymyz bolsa ómirdiń bir qýanyshy - balalarmen ýaqyt ótkizip, nemere mápelemek. Mundaı múmkindikter qarttarymyzdyń da, balalardyń da densaýlyǵy men rýxanı kúıine oń áserin tıgizedi degen senimdemin», deıdi qala ákimi.
Megapolıstegi janǵa jaılylyq syılaıtyn ortalyqta zeınetker qarııalar men múmkindigi shekteýli jandar, balalar úıiniń tárbıelenýshileri bos ýaqyttaryn ótkizip, densaýlyqtaryn jaqsarta alady. Sondaı-aq, munda zeınetkerlerge tegin áleýmettik jáne medısınalyq qyzmet kórsetiledi.
«Qoǵamnyń damýy qarııalarymyzǵa kórsetiletin qamqorlyqpen baıqalady. Jyldyń basyndaǵy eseptik kezdesýde qala turǵyndarynyń biri menen Shymkentten qart kisilerge ómir saltyn jaqsartyp, dene shynyqtyrýǵa arnalǵan ortalyq ashýdy suranǵan bolatyn. Mine, búgin osy ortalyqty ashyp otyrmyz. Zeınetkerler men qarııalar bul ortalyqqa otbasymen, balalary jáne nemerelerimen kele alady», dedi Ǵ.Ábdirahymov.
Shymkenttegi bul ortalyq Elbasy Nursultan Ábishuly Nazarbaevtyń otandastarymyzdyń ómir súrý jasyn uzartý men buqaralyq sportty damytý tapsyrmasy aıasynda ashylyp otyr. Aıta keterligi, shymkenttikterdiń ómir súrý jasy uzaryp keledi. Megapolıs turǵyndarynyń qazirgi tańdaǵy ortasha jasy 78 jastan asady.
Igilikti sharada qala ákimi turǵyndardy sportpen jappaı shuǵyldanyp, salaýatty ómir saltyn ustanýǵa shaqyrdy. Qarttarǵa arnap qoıylǵan konserttik qoıylymda balasha qýanǵan zeınetkerler bı bılep, án salyp, mereke shattyǵyna bólendi.
