- Búgingi kúndi Qazaqstan tarıhyndaǵy eleýli kún dep esepteımin. El úmitin aqtaımyn degen 7 kandıdat saılaýǵa tústik. Baǵdarlamamyzdy jarııaladyq. Soǵan saı búgin halyq óz tańdaýyn jasaıtyn kún. О́zim saılaý aldyndaǵy nasıhat jumystaryna baılanysty jáne halyqtyń talap-tilekterin tyńdaý maqsatynda elimizdiń 17 óńirinde de boldym. Jalpy baıqaǵanym, halyqtyń kóńil kúıi jaman emes. Biraq problemalardy da az aıtqan joq. Soǵan oraı osy saılaýda kim saılansa da, halyqtyń jan aıqaıyn estıtin kandıdat jeńiske jetse eken degen tilektemin, - degen Tóleýtaı Sataıuly óziniń jeńiske degen senimi bar ekendigin aıtyp ótti. Jýrnalısterdiń qoıǵan suraqtaryna jaýap bere kele nasıhat júrgizýge bergen bir aı ýaqyt jetkilikti bolǵandyǵyn, halyqty aralaý barysynda el ishinen oǵash oqıǵalardy baıqamaǵandyǵyn aıtty. Munan keıin saılaýshy retinde daýys berip, óz tańdaýyn jasady.
Ulttyq mýzeıde ornalasqan №52 saılaý ýchaskesiniń tóraǵasy Batyrhan Jumabaev jýrnalısterge bul ýchaskede 4661 adamnyń saılaýshy retinde tirkelgendigin, saǵat 9.00-ge deıin solardyń 10 paıyzy daýys berip úlgergendigin, ázirge tártip, zań buzý, basqadaı bir oǵash oqıǵalardyń tirkelmegendigin, saılaý barysyn partııalar atynan tirkelgen 5 baqylaýshynyń qadaǵalap otyrǵandyǵyn aıtyp ótti. Olar – Nur Otan, Ult taǵdyry, kommýnıster, kásipodaqtar, Amanat partııalarynyń ókilderi.
- Saılaý ýchaskemizge daýys berýge alǵashqy bolyp aqsaqal adam keldi. Ol kisi kýáligin umytyp ketken eken. Erinbeı úıine baryp, kýáligin alyp kelip, alǵashqy bolyp daýys berdi. Sóıtip alǵashqy saılaýshy retinde syılyqqa ıe boldy. Sondaı-aq kámelet jasyna tolyp, birinshi ret daýys bergen jastarǵa dál osy kúni týǵan adamǵa, jıyny 10-ǵa tarta adamǵa syılyq berdik. Túrli densaýlyq jaǵdaıyna, qarttyǵyna baılanysty biraz adamnan úıinde daýys berýge ótinishter tústi. Saǵat 12-den keıin úılerine daýys berý jáshigin aparyp, olardyń da daýysyn alatyn bolamyz, – dep málimdedi ol.
T.Raqymbekovty QR Prezıdentigine kandıdat retinde usynǵan «Aýyl» partııasy saılaý shtaby tóraǵasynyń orynbasary Ǵazız Tastaev óz kandıdattarynyń nasıhat jumystaryn belsendi túrde júrgizgendigin, bári de saılaý zańdylyǵyna sáıkes ótkendigin aıtyp berdi.
