Týrısterdiń qyzýǵyshylyǵyn oıatý jáne demalýshylardy tartý maqsatynda munda kóptegen sharalar atqaryldy. Qosymsha demalys oryndary ashyldy.
«Shalqar-Imantaý kýrorttyq aımaǵynyń damýyna respýblıkalyq bıýdjetten qomaqty qarjy bólindi. Sońǵy 3 jyldyń ishinde avtomobıl joldaryn jóndeýge 3 mıllıard teńge baǵyttaldy. Qorǵan, Omby, Túmen baǵyttary boıynsha jol qalpyna keltirildi. Bıyl Zerendige barar tasjol kúrdeli jóndeýden ótedi», dedi týrıstik maýsymnyń ashylý saltanatynda sóılegen sózinde aımaq basshysynyń orynbasary Dáýren Jandarbek.
Aýdandyq týrızm bóliminiń jetekshisi Amanbek Mahmetovtyń aıtýynsha, 38 demalys orny jumys isteıdi. 5 jańa ortalyq kúrdeli jóndeýden ótedi. Eń úlken joba–«Shalqar-Sý» sanatorııi. Ony qaltaly ınvestorlar óz qamqorlyqtaryna alǵan.
«Aqbar» týrıstik kesheni kúnine 200 adam qabyldaı alady. Byltyr 4 myń týrıst demalypty. 12 kottedj turǵyzylypty. Árqaısysy ystyq sýǵa deıin jabdyqtalǵan.
Jazǵy týrıstik maýsymnyń ashylýyna oraı jármeńke de ótti. «KAZ SOUVENIR» kompanııasy ekologııalyq taza shıkizattan jasalǵan ártúrli buıymdar usyndy.
«Metall synyqtaryn jınap, tazalaımyz. Sosyn óndep, túrli buıymdar ázirleımiz. Qaldyq aǵashtaryn da kádege jaratamyz. Káde syılarǵa usynys kóp», deıdi kompanııanyń ókili Álisher Hamzın.
Soltústik Qazaqstan oblysy.
