Ulttyq akademııalyq kitaphana men «Amangeldi Iman» qoǵamdyq qory birlesip uıymdastyrǵan is-sharada Jazýshylar odaǵynyń múshesi, Qazaqstannyń eńbek sińirgen mádenıet qyzmetkeri, Ereımentaý men Baıanaýyl aýdandarynyń qurmetti azamaty Saılaý Baıbosyn alǵashqy sózdi alyp, Astana men Almatydan jyraqtaǵy qalamgerlerdiń shyǵarmashylyǵy jiti baǵalana bermeıtinin, sol sebepti de óńirdegi jazýshylar nazardan tys qalatynyn tilge tıek etti. Osy olqylyqtyń ornyn toltyrý maqsatynda Astananyń ádebıetsúıer qaýymyna «Ajalyn joǵaltqan adam» atty romanyn tanystyrýdy kózdep kelgenin jetkizdi.
Parlament Senatynyń depýtaty Altynbek Nuhuly, Májilis depýtattary Qazybek Isa, Nurjan Áshimbetov, sondaı-aq professor Serik Negımov, jazýshylar Mádı Aıymbetov, Nurjan Qýantaıuly, Aıgúl Kemelbaeva, Jumaǵalı Qoǵabaı jańa roman taqyrybynyń tosyndyǵyn, kompozısııalyq qurylymyn, oqıǵa órbitýin, til jatyqtyǵyn, basqada jetistikterin aıta kelip, búgingi zamanaýı prozaǵa qosylǵan óz aıtary bar shyǵarma ekenin atap ótti.
Máselen, fılologııa ǵylymdarynyń doktory Serik Negımov sóılep, atalǵan romandy qyzyǵa oqyp shyqqanyn, týyndyda avtor sanaýly keıipkerlerdiń taǵdyry arqyly adamzatqa ortaq máńgilik qundylyqtardy, adaldyq pen satqyndyqty, meıirim men qatygezdikti, mahabbat pen tózimdilikti tereńnen ashqanyn áńgimeledi. «Kitapty oqyp otyryp, bas keıipkermen birge qınaldyq. Romandaǵy oqıǵalardyń shynaıylyǵy sondaı, denemizdi túrshiktirdi», dedi. Al senator Altynbek Nuhuly avtordyń aqyndyǵy men ólketanýshy retindegi eńbegine arnaıy toqtalyp, prozadaǵy osy bir úlken týyndysy búgingi oqyrmannyń izdep júrip oqıtyn dúnıesi bolatynyna senim bildirdi.
