Ál-Farabı atyndaǵy QazUÝ álemniń úzdik ýnıversıtetteriniń qataryna endi

QS álemdegi úzdik bilim ordalaryna kóp jyldan beri ǵalamdyq reıtıng júrgizip kele jatqan bedeldi ári yqpaldy, barlyq elde moıyndalǵan halyqaralyq agenttik. Reıtıngide alǵashqy úsh oryndy AQSh ýnıversıtetteri: Massachýsets tehnologııalyq ınstıtýty, Stenford jáne Garvard ýnıversıtetteri ıelengen.

QazUÝ elimizdiń jetekshi ýnıversıteti retinde Tuńǵysh Prezıdent – Elbasy Nursultan Nazarbev alǵa qoıǵan álemniń eń úzdik 200 ýnıversıtetiniń sanatyna ený boıynsha mańyzdy memlekettik mindetti júzege asyrý úshin maqsatty túrde jumys isteýde. Sońǵy bes jylda ýnıversıtet «QS WUR» reıtınginde 400 satydan astam beleske kóterildi. Álemdik tájirıbede birde-bir JOO mundaı ósý qarqynyna kol jetkizgen emes! QS sarapshylarynyń usynysy boıynsha QazUÝ tájirıbesi álemdegi jetekshi ýnıversıtetterde zerttelýde. Mundaı kórsetkish bilim berý men ǵylymnyń álemdik naryǵyndaǵy ýnıversıtettiń joǵary básekege qabilettiliginiń dáleldi aıǵaǵy.

Aıta ketý kerek, «QS WUR by Subject» pándik reıtınginiń nátıjesinde QazUÝ TMD elderi joǵary oqý oryndarynyń arasynda birinshi bolyp álemdegi eń úzdik 51-100 topqa engen. Jalpy atalmysh reıtıngige jetekshi qazaqstandyq ýnıversıtettiń alty mamandyǵy kirdi.

Ǵalamdyq ǵylymı-bilim berý keńistigindegi QazUÝ róliniń artýyn eskere otyryp, QS Qazaqstanda halyqaralyq forým ótkizýdi sheshti. Ýnıversıtettiń ǵana emes, sonymen qatar Qazaqstannyń búkil joǵary bilim berý júıesiniń álemdik bıik bedeliniń kórsetkishi bolyp tabylatyn «Adamı mura jáne joǵary tehnologııalar úılesimi negizinde jetilý» atty álemdik deńgeıdegi shara 2019 jyldyń qyrkúıeginde ál-Farabı atyndaǵy QazUÝ negizinde ótedi.

QazUÝ basqa da bedeldi halyqaralyq reıtıngterde serpilispen alǵa jyljýda. «Times Higher Education» Brıtandyq agenttiginiń zertteý nátıjesi boıynsha QazUÝ Ortalyq Azııada alǵash bolyp álemdegi eń úzdik JOO-lar tobyna kirdi. «UI Green Metric Ranking of World Universities» jahandyq reıtınginde QazUÝ 172 oryn alsa, Eýropalyq ǵylymı-ónerkásiptik palatasy eýropalyq reıtınginde QazUÝ «AA» baǵasyna ıelenip, jetekshi eýropalyq joǵary oqý oryndarynyń tobyna endi. Tanymal halyqaralyq «Great Value Colleges» (AQSh) uıymynyń zertteý nátıjesi boıynsha QazUÝ álemniń tehnologııalyq damyǵan ýnıversıtetiniń ishinde 31-shi oryndy baǵyndyrdy.

Aýqymdy qurylymdyq modernızasııalaý, nátıjelerge negizdelgen menedjmenttiń joǵary tıimdiligi jáne sońǵy bes jylda 50%-ǵa deıin ósken biregeı ınfraqurylymdardyń qarqyndy damýy QazUÝ-dyń reıtıngilerdegi alǵa jyljýynyń mańyzdy faktory boldy.

Ýnıversıtettiń álemdik turǵyda tanylýy halyqaralyq áriptestiktiń, ınternasıonalızasııanyń damýymen, sonymen qatar QazUÝ-dyń BUU «Akademııalyq yqpal» baǵdarlamasynyń turaqty damý jónindegi ǵalamdyq haby retindegi belsendi qyzmetimen baılanystyrýǵa bolady.

ALMATY