– Bizdiń kópshiligimiz – ıaǵnı búgingi konferensııaǵa qatysýshy zamandastar eki dáýirde ómir súrip kelemiz. Búgingi kezdesýimiz – keıbireýler sholaq oılaıtyndaı – ótkendi ańsaý emes – tarıhymyzdan sabaq alý, ósý joldarymyzdy jadymyzda saqtaý, teńsizdikten arylyp, teńdikke qol jetkizýimizdiń qadirin, qasıetin bilý.
Osydan 30 jyl buryn – 22 maýsym kúni Qazaqstan qoǵamy birinshi basshy laýazymyna Nursultan Nazarbaev áldeqashan laıyqty bolsa da, sol kezdegi Ortalyq bılik, ıaǵnı SOKP Bas hatshysy M.Gorbachevtiń oınamaly saıasatynan kóńilimiz alańdap, júrek tynysh tappaı, «86-shy jyldaǵydaı taǵy qandaı kútpegen oqıǵa bolýy múmkin», – dep Ortalyq Komıtetke kelip edik. Almatyda tańerteń azdap jyly jańbyr jaýyp, kún jadyrap shyqqan... Jaqsylyqqa jorydyq...
Pleným ashylyp, minbege Máskeýdegi Odaqtyq Ortalyqtyń ókili – SOKP Ortalyq Komıtetiniń Saıası Bıýrosynyń múshesi, SOKP OK hatshysy V.M.Chebrıkov kóterilgende, «ne aıtar eken?», dep, zal siltideı tyndy. Máskeý ókiliniń aýzynan «Nursultan Nazarbaev» – degen sóz shyqqanda zalda otyrǵan bes júz adam jyly qarsy alyp, uzaq qol soǵyp, qoldaý kórsetip edi.
Dál osy kúni, dál osy zalda Qazaqstan Kompartııasy Ortalyq Komıtetiniń HÚ Plenýmy ótkizilip, osyǵan deıin Qazaq SSR-i Mınıstrler Keńesi Tóraǵasy qyzmetin atqarǵan Nursultan Ábishuly kóp tileýi qabyl bolyp, Qazaqstan Kompartııasy Ortalyq Komıtetiniń birinshi hatshysy bolyp saılandy.
Sol kúnnen bastap Qazaqstan basshysynyń respýblıka jurtshylyǵynyń múddesindegi árbir sózi, árbir bastamasy qalyń eldiń kóńilinen shyǵyp, Máskeýdegi Ortalyq bılik bizdiń basshymyzben sanasatyn bolyp, eńsemiz kóterile bastady.
Osylaısha, Qazaqstannyń jańa dáýiri bastalyp edi...
Nursultan Ábishuly birden Odaqtyq ınstıtýttardyń eskirgenin, zaman talabynan qalyp qoıǵanyn, ásirese, ekonomıka, ult, basqarýshy apparat, kadr máseleleriniń shamadan tys ortalyqtanyp ketkenin, kóptegen ádis-tásildiń, keıbir sheshimderdiń ádiletsizdigin, qaýly-qararlardyń jaramsyzdyǵyn, Odaqtyq mártebeli jıyndardyń minberinen ashyq, batyl synǵa aldy.
Birer mysal: 86-jylǵy 17-18 jeltoqsandaǵy stýdent-jastardyń sherýine baılanysty 1987 jyly SOKP Ortalyq Komıteti arnaıy qaýly qabyldap, sol qujatta «kazahskıı nasıonalızm» dep baǵa bergen. Nursultan Ábishuly osy qaýlynyń ádiletsizdigin dáleldep, áldeneshe ret Saıası Bıýroda kóterip júrip, qaýlynyń kúshin joıǵyzdy. Bul – bıleýshi Kompartııa tarıhynda buryn-sońdy bolmaǵan oqıǵa edi.
Birinshi hatshy bolyp saılanysymen bir aıdan keıin Qaraǵandydaǵy shahterler ereýilin toqtatyp, olardyń talap-tilekterin sheshý joldaryn belgiledi.
Uly Otan soǵysyndaǵy eńbegi, erligi qazaq sheńberinen alysqa shyǵyp júrse de laıyqty baǵasyn ala almaǵan Baýyrjan Momyshulyna Keńes Odaǵynyń Batyry ataǵyn bergizdi.
Memlekettik basqarýdy jańǵyrtyp – Respýblıka Prezıdenti laýazymyn kirgizdi.
Semeıdegi ıadrolyq polıgondy japty.
Kosmodrom qazaq jerinde bolsa da kosmonavtary bolmaǵan eldiń eki ulany Toqtar Áýbákirov pen Talǵat Musabaevty ǵaryshqa ushyrdy.
Dúnıejúzi qazaqtarynyń tuńǵysh quryltaıyn ótkizip, táýelsizdik jyldary bir mıllıonnan astam otandasymyzdyń Qazaqstanǵa kelýine jaǵdaı týǵyzdy.
Osy sııaqty elimizdiń mártebesin kótererlik ǵasyrlar boıy arman bolǵan Táýelsizdik jeńisterine Tuńǵysh Prezıdentimiz, Elbasy bastamashy boldy, – dedi Qýanysh Sultanov.
ALMATY
