Mahambet syılyǵynyń ıegeri, belgili aqyn Svetqalı Nurjan bastaǵan qazylar alqasy músháıraǵa túsken 100-ge jýyq óleńge baǵa berdi. Jyr dodasynyń qorytyndysynda júldeli úshinshi oryndy Toqtaráli Tańjaryq, Dınara Málik, Janerke Ǵınaıat ıelendi. Ekinshi orynnyń tuǵyrynan Batyrhan Sársenhan, Asylanbek Shyǵyrov kórindi. Birinshi júldeni Qalqaman Sarın enshiledi. Farıza Ońǵarsynovanyń otbasy atynan uly Almas Ońǵarsynov pen nemeresi Alan Aıvaruly jas aqyn Araılym Jaqsylyqqa arnaıy júlde tapsyrdy.
Músháıranyń bas júldegeri - Mıras Asanǵa marapatty Atyraý oblysynyń ákimi Nurlan Noǵaev tapsyrdy.
- Búgingi óleńniń toıy – aqyn toıy Atyraý elindegi shymyldyǵyn ashqaly otyr. Qazaqta «Alýan-alýan júırik bar, áline qaraı shabady» degen jaqsy sóz bar. Jazba poezııa ókilderiniń qatysýymen ótken bul baıqaý shyn mánisindegi talantty jastardyń keleshegine qanat bitiredi degen oıdamyz. Asa kúrdeli, jumbaq, asqaq aqynnyń óleńdegi beınesin jasaýǵa talpynys bildirgen 100 – ge tarta úmitkerdiń arasynan ozyq shyqqandar búgin Farıza Ońǵarsynqyzy týǵan jerge kelip otyr. Farıza apamyz júzdegen jas talantty qanatynyń astyna alǵan qamqor ustaz boldy. Ol tusaýyn kesken kóptegen jastar búginde qazaq ádebıetiniń belgili ókilderine aınalyp úlgerdi - dep atap ótti aımaq basshysy Nurlan Noǵaev.
Atyraý oblysy ákimdigi, oblystyq mádenıet, arhıvter jáne qujattama basqarmasynyń qoldaýymen Qazaqstan Jazýshylar Odaǵy oblystyq fılıaly, «Rýhanııat» jastar qoǵamdyq birlestigi uıymdastyrǵan respýblıkalyq músháıra Farıza Ońǵarsynovanyń shyǵarmashylyǵyn dáripteýdi, jas talanttarǵa qoldaý kórsetip, jańa esimderdi shyǵarýdy maqsat etti.
Músháıranyń bas júldesin ıelengen belgili aqyn, «Egemen Qazaqstannyń» bólim meńgerýshisi Mıras Asandy áriptesteri atynan quttyqtap, bıik belesterdi baǵyndyra berýin tileımiz.
