– Kartochka arqyly jasalǵan qolma-qol aqshasyz qarjy aınalymyna bonýs tóleý jaǵyn qazir banktermen birlesip qarastyrýdamyz. Bul bonýs memleket tarapynan tólenedi, – dedi Forbes.kz suraǵyna jaýap bergen Ulttyq ekonomıka mınıstri Rýslan Dálenov.
Mınıstrdiń aıtýynsha, memleket esebinen beriletin bonýs kólemi kartochkamen júrgizilgen qarjy aınalymynyń 1-2 paıyzyn quraýǵa tıis. Túsken bonýsty belgili bir taýar satyp alýǵa nemese salyqty óteýge paıdalanýǵa bolady.
Bul jańalyqty júzege asyrý úshin eki máseleni sheship alý kerek. Birinshiden, bankter kartochkalardyń kólemi, jasalǵan operasııalar týraly aqparattardy jetkizip otyrý jaǵyn sheshýge tıis. Ekinshi másele, memleket tarapynan bonýsty usyný tetikterine qatysty.
– Bul iske qatysty ámbebap tetik áli jasalǵan joq. Degenmen, biz halyq qolma-qol aqshasyz, kartochkamen tóleýge qyzyǵýshylyq tanytady dep sanaımyz. Sol arqyly naryqtaǵy teńge aınalymyn aıtarlyqtaı tómendetýge qol jetkizemiz. Naryqtaǵy teńge aınalymy týraly barynsha dál aqparatty bilsek, salyq saıasatynda da soǵan saı ózgerister júrgizýge bolady. Mysaly, salyq aýyrtpalyqtaryn jeńildetý máselesi kóterilýi múmkin, – deıdi R.Dálenov.
Taǵy bir aıta keterligi, jeke tulǵalar arasynda iri kelisimsharttar boıynsha eseptesý kezinde qolma-qol aqshanyń kólemine shekteý qoıylýy yqtımal.
– Másele elıtalyq páterler, qymbat turatyn lıýks avtokólikterge qatysty. Árıne bir bólmeli páter úshin, ne bolmasa aýyldyq jerlerdegi úıler úshin qolma-qol aqshasyz eseptesýdi mindetteý azamattarǵa qıynǵa soǵýy múmkin ekenin túsinemiz. Onyń ústine, bul adamdardyń quqyn shekteıdi. Sol úshin qazir banktermen birlesip, shekti somanyń kólemin oılastyryp jatyrmyz, – dedi mınıstr.
Úkimette zańdy tulǵalardy ózara kelisimsharttardy qolma-qol aqshasyz júzege asyrýǵa yntalandyrý tetikteri qarastyrylyp jatqanyn da aıta ketý kerek.
