Foto: Ashyq derekkóz
Qujatqa sáıkes, vaksınalaý 14 jastan 17 jas 11 aı 29 kúnge deıingi qyzdarǵa erikti túrde júrgiziledi. Ekpe ata-anasynyń nemese zańdy ókiliniń aqparattandyrylǵan kelisiminen keıin salynady.
Qosymsha ımmýndaý 4 valentti «Gardasıl» vaksınasymen júrgiziledi. Vaksına APV-nyń 6, 11, 16 jáne 18 tıpterinen qorǵaıdy. Ekpe úsh kezeń boıynsha salynady:
- birinshi doza – kez kelgen kúni;
- ekinshi doza – alǵashqy egýden keıin 2 aı ótken soń;
- úshinshi doza – alǵashqy egýden keıin 6 aı ótken soń.
Vaksınalaý bilim berý uıymdarynyń medısınalyq kabınetterinde jáne emhanalardaǵy egý bólmelerinde ótkiziledi.
Papılloma vırýsyna qarsy vaksına qyzdarǵa da, er balalarǵa da qajet
Qaýlyda ımmýndaý kezinde saqtalýǵa tıis talaptar da kórsetilgen. Atap aıtqanda, egý bólmelerinde fızıkalyq araqashyqtyq saqtalyp, bir mezette úsh qyzdan artyq shaqyrylmaıdy. Bir egý brıgadasyna kúnine 40 baladan artyq vaksına salmaý usynylǵan.
Sondaı-aq ekpe alǵandar vaksınadan keıin 30 mınýt dáriger baqylaýynda bolady. Mektep psıhologtary men áleýmettik pedagogter túsindirý jumysyna tartylyp, balalardyń psıhoemosııalyq kúıine nazar aýdarylady.
Medısına qyzmetkerleri árbir ata-ana men jasóspirimge vaksına týraly tolyq aqparat berýge mindetti. Olarǵa ekpeniń áseri, yqtımal janama belgileri jáne vaksınadan bas tartýdyń saldary túsindiriledi.
Qujatta vaksınadan keıingi yqtımal reaksııalar da kórsetilgen. Alǵashqy úsh kúnde dene qyzýy kóterilýi, álsizdik, bas aýrýy, qaltyraý, ekpe salynǵan jerdiń qyzarýy men aýyrsynýy baıqalýy múmkin. Sırek jaǵdaıda allergııalyq reaksııalar men júıke júıesine qatysty belgiler tirkelýi yqtımal.
Degenmen, mamandar bul belgilerdiń kóbine ýaqytsha ekenin jáne 3 kún ishinde basylatynyn atap ótti.
Qaýly 14 mamyrdan bastap kúshine endi.
Buǵan deıin Densaýlyq saqtaý mınıstrligi 1 mamyrdaǵy jaǵdaı boıynsha elimizde 11-13 jastaǵy qyzdarǵa APV-ǵa qarsy 398 myńnan astam ekpe salynǵanyn habarlaǵan edi. Onyń ishinde 248 myń qyz birinshi dozany, 150 myń qyz ekinshi dozany alǵan. Resmı málimetke sáıkes, vaksınadan keıin asqyný jaǵdaılary tirkelmegen.
