26 maýsymda О́skemende kópbalaly otbasylardy turǵyn úımen qamtamasyz etý máselesin sheshý jónindegi qoǵamdyq komıssııanyń kezekti otyrysy ótken bolatyn. Oblys ákimi Danıal Ahmetovtiń ózi jetekshilik etetin komıssııa quramyna kópbalaly analar, BAQ jáne qoǵamdyq birlestik ókilderi engen-di. Qoǵamdyq komıssııanyń bul jolǵy otyrysynda óńirdegi 26 myńnan astam kópbalaly otbasylarǵa qatysty birneshe másele qaraldy. Jıynda oblystyq Bilim basqarmasy basshysynyń orynbasary Aıgúl Baıjanova aldaǵy jańa oqý jylynda aımaqtaǵy barlyq kópbalaly jáne turmysy tómen otbasynyń balalaryna (olardyń sany - 33 583, onyń 23 myńy kópbalaly, 10 myńy áleýmettik jaǵynan az qamtylǵan otbasylardyń oqýshylary) mektep formasy tegin, ıaǵnı memleket esebinen satyp áperiletinin aıtty. Qazir osy maqsatqa oblys, qala jáne aýdan bıýdjetterinen 626 mln. teńge qarjy bólinip, Shyǵys Qazaqstandaǵy mektep formalaryn tigetin 5 taýar óndirýshi («Aqtumar», «ÝK Iýnıs», «Semspessnab», «Aqmańdaı», «Instar») anyqtalypty. Basqarma basshysynyń orynbasarynyń aıtýynsha, dál qazirgi ýaqytta (26 maýsymdaǵy jaǵdaı boıynsha) óńirdegi 580 mekteptiń 260-sy forma satyp alý jóninde kelisimshart jasasypty, 299 mektep kelisimshartty 1 shildege deıin aıaqtaýǵa ýáde beripti. Abaı, Aıagóz, Borodýlıha, Kúrshim, Tarbaǵataı jáne Úrjar aýdandary bul jumysty 100 prosentke jetkizipti. Al Besqaraǵaı aýdanyndaǵy 21 mektep jergilikti taýar óndirýshilermen áli kúnge deıin kelisimshart jasaspapty. «Bul máseleni aqpan aıynda aıtqanbyz. Eki aıdan keıin sabaq bastalady. Al sizder áli júrsizder! Qarajat bar, taýar óndirýshiler belgili. Nege iske kirispeısizder? Bir apta ýaqyt beremin. Másele sheshilmese, komıssııa otyrysynda qaraımyz» dedi Danıal Ahmetov.
Aıtpaqshy, osy jıynda Besqaraǵaı aýdany ákimdiginiń kópbalaly otbasylardy baspanamen qamtý jónindegi aýdandyq komıssııa jumysyna salǵyrt qaraǵandyǵy da belgili boldy. Qoǵamdyq komıssııa otyrysyn jýrnalısterdiń, óńirdegi búkil aýdan ákimderiniń qatysýymen beıne rejımde ótkizgen oblys ákimi Danıal Ahmetov jıyn barysynda aýdan ákiminen keıin aýdandaǵy komıssııa quramyna engen kópbalaly analardyń birimen mindetti túrde sóılesip, qolyndaǵy tizimge qarap, aty-jónin aıtyp, baspana máselesiniń jergilikti jerde qalaı sheshilip jatqanyna kóz jetkizýge tyrysty. Bir qyzyǵy, Besqaraǵaı aýdany ákimdigi jıynǵa komıssııa quramyna engen kópbalaly otbasylardyń birde-birin shaqyrmapty. «Komıssııa múshesi Tatıana Vlasova bar ma?» degen oblys ákiminiń suraǵyna: «onyń balasy aýyryp qalyp, kele almady» dese, al aımaq basshysynyń «Lıýbov Ivanovna qaıda?» degen saýalyn jaýapsyz qaldyrdy. «Men aýdan ákimderine: «Eń kem degende úsh kópbalaly ana komıssııaǵa kirsin» dep tapsyrma bergenmin. Birde bireýi joq» dep ashýǵa býlyqqan Danıal Ahmetov aýdan ákiminiń orynbasary Nurlan Muhametraqymulyna eńbek demalysynda júrgen Besqaraǵaı ákimin shuǵyl jumysqa shaqyryp, osy máselemen shuǵyldanýdy jáne «Nur Otan» partııasy oblystyq fılıaly tóraǵasynyń birinshi orynbasary Ánýarbek Muhtarhanovqa partııalyq komıssııa quryp, aýdandaǵy kóp balaly analarmen kezdesýdi tapsyrdy.
О́SKEMEN
Sýretti túsirgen V.Petýhov
