Jobalyq keńse M.Nárikbaev atyndaǵy QazMZÝ bazasynda Bilim jáne ǵylym mınıstrligi jáne onyń vedomstvolyq baǵynysty uıymdarynyń laýazymdy tulǵalary, sondaı-aq akademııalyq saraptama salasynan tartylǵan tulǵalar men qoǵam ókilderinen qurylady. Bul joba bilim jáne ǵylym júıesindegi turmystyq sybaılas jemqorlyq deńgeıin joıýǵa, sonymen qatar azamattardyń Mınıstrlikke, bilim berý uıymdaryna jáne ǵylymı uıymdarǵa degen senimin arttyrýǵa baǵyttalatyn bolady.
Bul nátıjege sybaılas jemqorlyq faktilerin taldaý jáne azaıtý, bıznes úrdisterdi ońtaılandyrý, memlekettik qyzmetterdi avtomattandyrý jolymen qol jetkiziletin bolady.
«Búgin biz osy ýnıversıtetke arnaıy kelip bilim salasy boıynsha jobalyq keńse ashqaly otyrmyz. Jalpy bilim salasy jemqorlyqpen kúresý boıynsha jáne jemqorlyqqa múldem jol bermeýshilik mádenıetin qalyptastyrý qajet. Bilim - óte aýqymdy sala. 10-15 mıllıon Qazaqstan azamatynyń bilim salasyna qalaı bolsa da, kúndelikti qatysy bar. Tek muǵalimderdiń ózi 300 myńǵa jýyqtaıdy. Bilim salasynda bolyp jatqan máselelerdiń barlyǵy halyqtyń basty nazarynda ekeni belgili. Elbasynyń tapsyrmasyna sáıkes Adaldyq alańy negizinde osy tájirıbeni iske asyrý barlyq respýblıka boıynsha júrgizilip jatyr. Bizdiń mınıstrlikte osyǵan qosylýda. Negizgi maqsatymyz jemqorlyqpen kúresý. Bilim berý salasy, tárbıe salasy tikeleı bizdiń mınıstrlikke júktelgennen keıin ol jaýapkershilikti júıeli jumystar arqyly sheshýge, jemqorlyqqa jol bermeýge, adaldyq mádenıetin qalyptastyrýǵa júıeli jumystar atqaramyz», dedi Ashat Aımaǵambetov.
Atalmysh jobalyq keńse bilim jáne ǵylym júıesinde sybaılas jemqorlyqqa qarsy is-qımyl boıynsha pármendi sharalar ázirleıtin jáne osy salada strategııalyq josparlaýdy júzege asyratyn tıimdi qurylym bolady dep kútilýde.
Al Sybaılas jemqorlyqqa qarsy is-qımyl agenttiginiń Tóraǵasy Alık Shpekbaev Qazaq memlekettik zań ýnıversıteti elimizdegi sybaılas jemqorlyqtyń «ıisi» de joq joǵary oqý oryndarynyń biri sanalatynyn basa aıtty.
«Qazaqstan búgingi tańda jemqorlyqtan taza, zamanaýı memleket qurýda. Zamanaýı eldiń eń negizgi basymdyǵy - ashyqtyq, aıqyndyq, qoǵam aldynda esep beretin memleket túzý. Munan keıingi basymdyq - kásibı, derbes, ekonomıkalyq turǵyda yntalandyrylǵan memlekettik apparat qalyptastyrý», dedi Alık Shpekbaev.
Raýan QAIDAR,
«Egemen Qazaqstan»
