Jańa dáýirdi asqaqtata jyrlaǵan zamana jyraýynyń halyq arasynda keń taraǵan «Oıjaılaý», «Bazarym-aı, Nazarym-aı», «Jas ekpin», «Týǵan jer», «Shyrqa, daýsym» syndy dastandary keshtiń shyraıyn kirgizip, sýsaǵan tyńdarmannyń qulaq quryshyn qandyrdy. Sondaı-aq konsertte Qazaqstannyń eńbek sińirgen qaıratkerleri Janǵalı Júzbaı, Ardaq Balajanova, «Astana sazy» folklorlyq ansambli men E.Shaldybekovtiń shákirtteri óner kórsetti.
Bala kezden qolyna dombyra ustap, ánge qumartyp ósken Erbolat ánshilik ónerdiń naǵashy jurtynan daryǵanyn aıtady. Ol Almatydaǵy Júsipbek Elebekov atyndaǵy estrada-sırk kolledjinde oqyp, keıin Qurmanǵazy atyndaǵy qazaq ulttyq konservatorııasynyń «Halyq ánderi» kafedrasyn bitirgen. Jetisý óńirindegi jyrshylyq-jyraýlyq, ánshilik ónerdiń qalyptasýyna zor úles qosqan Ásimhan Qospasarov, Álimqul Jambylov, Sábıt Orazbaev, Hamza Ekeıbaıuly syndy tulǵalardyń aldyn kórgen ónerpaz halyqtyń ǵasyrlar boıy qalyptasqan rýhanı asyl qazynalaryn búgingi ómirimen sabaqtastyryp keledi.
– Qazaq degen ult turǵanda dástúrli ánimiz de, tilimiz ben dinimiz de, tarıhymyz ben salt-dástúrimiz de ólmeıdi. О́ıtkeni qazaq halqy qansha qıyn kezeńnen, náýbetten ótti. Sonyń ózinde dástúrli án aýyz ádebıeti arqyly osy kúnge deıin jetti. Qazaqtyń tól óneri jaıly bizden keıingi urpaq ta biledi dep oılaımyn. Qazir kásibı mamandar, zertteýshiler kóbeıip jatyr. Dástúrli ánshilerdiń árqaısysy shákirt tárbıelep otyr. Osyndaı kezde dástúrli óner nege aqsap qalýy kerek degen oı týady. Kerisinshe, qazaqtyń tól óneri damyp, kásibı oryndaýshylar kóbeıedi dep senemin, – deıdi «Qazaqkonsert» memlekettik konserttik uıymynyń solısi Erbolat Shaldybekov.
