Parlament jumysynyń qorytyndysy: 82 zań qabyldandy

Birlesken otyrysqa Senattyń 49 depýtatynan 41 depýtat, Májilistiń 107 depýtatynan 99 depýtat jáne Premer-Mınıstr, Memlekettik hatshy, sonymen qatar Konstıtýsııalyq Keńestiń, Joǵarǵy sottyń, Ortalyq saılaý komıssııasynyń tóraǵalary, Úkimet músheleri, respýblıka Prezıdentine tikeleı baǵynatyn jáne esep beretin memlekettik organdardyń basshylary, Prezıdent Ákimshiliginiń, Premer-Mınıstr keńsesiniń, Parlament palatalary apparattarynyń jaýapty qyzmetkerleri jáne buqaralyq aqparat quraldarynyń ókilderi qatysty.

Birlesken otyrys barysynda Májilis Tóraǵasy sessııa jumysyn qorytyndylaı kele, Parlament Tuńǵysh Prezıdent – Elbasy Nursultan Nazarbaevtyń tórtinshi sessııanyń ashylýynda bergen tapsyrmalary men Qazaqstan halqyna Joldaýy basshylyqqa alynǵanyn aıtty.

N.Nyǵmatýlın atap ótken málimet­ter­ge toqtalsaq, sessııa barysynda qos Pa­latanyń 5 birlesken otyrysy, Májilistiń 41 jáne Senattyń 26 jalpy otyrysy ótken. Onda 319 mańyzdy másele qaralǵan. Jalpy tórtinshi sessııa bastalǵan kezden 83 zań jobasy qabyldanǵan. Onyń ishinde 82 zań jobasyna Memleket basshysy qol qoıyp, olar óz kúshine engen.

– Osy qabyldanǵan árbir zań, eń aldymen, Elbasymyz Nursultan Ábishuly Nazarbaevtyń strategııalyq jáne áleý­mettik bastamalaryn oryndaýǵa baǵyt­taldy. Árbir zań, sonymen birge eli­mizdiń damýyna, halqymyzdyń ómir sa­pasyn kúsheıtýge jańa serpin berdi. Al eń bastysy, qabyldanǵan barlyq qujattar azamattardy qoldaýǵa jáne qorǵaýǵa arnaldy. Osynyń barlyǵy eki palata depýtattarynyń birlesken jumystarynyń nátıjesi dep sanaımyz. Osy oraıda Senat ta, Májilis te zań shy­ǵarý jumysyna belsendi aralasyp, alǵa qoıǵan basym baǵyttar nátıjeli júzege asyryldy, – dedi Májilis Tóraǵasy.

Májilis Tóraǵasy atap ótken mańyzdy zań jobalarynyń qatarynda Qazaqstan Prezıdenti Qasym-Jomart Toqaevtyń Astana qalasynyń ataýyn Nur-Sultan dep ózgertý jóninde bastamasyna oraı depýtattar qabyldaǵan «Qazaqstan Respýblıkasynyń Konstıtýsııasyna ózgerister engizý týraly» Zań bar. Sonymen birge Elbasynyń bastamasymen Túrkistan oblysy jáne Shymkent qalasynyń aldaǵy damý jospary Konstıtýsııalyq zańmen bekitildi. Sondaı-aq Parlamenttiń árbir sessııasynda negizgi oryn alatyn elimizdiń bas qarjy qujaty respýblıkalyq bıýdjetti qabyldap, úsh kún buryn ǵana 2019-2021 jyldarǵa arnalǵan respýblıkalyq bıýdjetke taǵy da túzetýler engizildi. Ol tikeleı Elbasymyzdyń strategııalyq mindetterin jalǵastyrý maqsatyndaǵy Memleket basshysy Qasym-Jomart Toqaevtyń naqty áleýmettik tapsyrmalaryn júzege asyrýǵa arnalǵan.

Osy qatarda «Densaýlyq saqtaý máseleleri boıynsha», «Dárilik zattar men medısınalyq buıymdardyń aınalysy máseleleri boıynsha» jáne «Kınematografııa týraly», «Standart týraly», «Kólik máseleleri boıynsha» birqatar zańdar qabyldandy.

– «Densaýlyq saqtaý máseleleri boıynsha» Zańdy qabyldaý kezinde depýtattar tegin medısınalyq kómektiń memlekettik kóleminiń jańa modelin engizý sııaqty basqa da densaýlyq saqtaý salasynyń jekelegen máselelerin rettedi. Al «Dárilik zattar men medısınalyq buıymdardyń aınalysy máseleleri boıynsha» qabyldanǵan Zań dárilerdiń qoljetimdi jáne baǵasynyń turaqty bolýyna jańa serpin berdi. Gýmanıtarlyq baǵytty aıtatyn bolsaq, alǵash ret «Kınematografııa týraly» Zań qabyldanǵanyn erekshe atap ótý kerek. Buǵan deıin elimizde bul salaǵa qatysty qujat bolmaǵan. Sondyqtan jańa qujatta kıno óndirisin qoldaýǵa, otandyq fılmderdiń sapasy men básekege qabilettigin arttyrý úshin jaǵdaı jasaldy, – dedi N.Nyǵmatýlın.

Májilis Tóraǵasynyń aıtýynsha, Parlament kásipkerlikti qoldaýǵa jaǵdaı jasaý úshin bıznes-ortany damytý jáne saýda qyzmetin retteýge qatysty zańnamaǵa ózgerister engizdi. Ol bıznes salasyn jáne saýda qyzmetin nyǵaıtýǵa erekshe yqpal etedi. Parlament «100 naqty qadam» Ult josparyn iske asyrýdy jalǵastyryp, «Qazaqstan Respýblıkasy ortalyq jáne jergilikti atqarýshy organdardyń fýnksııalaryn básekeles ortaǵa berý máseleleri boıynsha» mańyzdy Zań qabyldady. Senat jáne Májilis depýtattary elimizdiń syrtqy saıasatyn júzege asyrý jolynda belsendi jumystar atqardy.

– Sessııa barysynda depýtattar 12 halyqaralyq parlamenttik uıym sheń­berinde belsendi jumys istedi, 327 ha­lyqaralyq is-sharaǵa qatysty jáne 80-nen astam shetel parlamentterimen yntymaqtastyqty arttyrýǵa úlesterin qosty. Sessııa barysynda depýtattyq korpýs Úkimet engizgen zań jobalarymen tabysty jumys istep qana qoımaı, óziniń zań shyǵarý bastamasyn da jemisti oryndady. Sonyń ishinde, Elbasynyń Nur Otan partııasynyń XVIII sezinde bergen tapsyrmasyna sáıkes depýtattar «Turǵyn úı qatynastary máseleleri boıynsha» Zańǵa bastamashy boldy. Ol kóp balaly otbasylar men jumys isteıtin jastardy turǵyn úımen qamtamasyz etýge jol ashty, – dep atap ótti Májilis Tóraǵasy.

 Parlament ótken sessııada Úkimetpen, basqa da memlekettik organdarmen, qo­ǵamdyq uıymdarmen jáne halyqpen óza­ra jumystardy odan ári tabysty jal­ǵastyrdy. Osyǵan oraı, Parlamentte 20 Úkimet saǵaty, 3 Parlamenttik tyńdaý, 24 dóńgelek ústel, komıtetterdiń 29 kósh­peli otyrysy jáne 4 halyqaralyq konferensııa uıymdastyrylǵan. Parlament jumysynda 319 depýtattyq saýal jol­danǵan. Sonymen qatar osy sessııada Parlament depýtattaryna azamattardan 7 myńǵa jýyq hat kelip túsip, olardyń barlyǵy zańǵa sáıkes qaraldy. Jalpy aıtqanda, Parlament depýtattary 2 myńnan astam qalalar men aýyldardy aralap, 4 myńdaı kezdesý ótkizgen.

Otyrys barysynda Májilis Tóraǵasy Parlament pen Úkimet ózara tıimdi qyzmet atqarǵanmen, oryn alǵan kemshilikterdiń kezdeskenin de atap ótti. Osyǵan sáıkes, Úkimettiń zań jobalaý jumysyna basa nazar aýdarý qajettigin aıtty.

– Osy oraıda, aldaǵy besinshi sessııa jumysyn aıta ketsek, Parlament Elbasy Nursultan Ábishuly Nazarbaevtyń Joldaýy men Áleýmettik qamqorlyq bastamalaryn iske asyrýǵa arnalǵan jumystardy odan ári jalǵastyrady, – dedi N.Nyǵmatýlın.

Sonymen birge depýtattar óz ju­mys­tarynda Memleket basshysy Qasym-Jomart Toqaev usynǵan 10 negizgi ba­ǵytyn basshylyqqa alady. Qazirgi ýa­qytta Parlament qorjynynda 34 zań jobasy bar. Atap aıtqanda, «2020-2022 jyldarǵa arnalǵan respýblıkalyq bıýdjet týraly», «Halyq densaýlyǵy já­ne densaýlyq saqtaý júıesi týraly» kodeks, «Ekologııalyq kodeks» pen «Pe­dagog mártebesi týraly» jáne má­de­nıet máselelerine arnalǵan zańdar bar.

Sondaı-aq aldaǵy sessııada Par­la­mentte tarıhı mańyzy zor iri halyq­aralyq shara ótetin bolady. Ol – bıyl­ǵy 23-24 qyrkúıekte elordamyz Nur-Sultan qalasynda ótetin Eýrazııa elderi Parlamentteri spıkerleriniń tórtinshi forýmy. «Úlken Eýrazııa: Dıalog. Se­nim. Seriktestik» dep atalatyn osy ma­ńyz­dy jıynǵa 60-tan astam eldiń parlament ókilderi qatysady Onyń ishinde 43 memlekettiń Parlament tóraǵalary, 16 halyqaralyq jáne parlamenttik uıym basshylary kelmek. Bul shara – Tuńǵysh Prezıdentimiz – Elbasy Nursultan Nazarbaevtyń Eýrazııalyq ıntegrasııa ıdeıasynyń 25 jyldyǵyna arnalady.

Sózin qorytyndylaı kele, Májilis Tóraǵasy N.Nyǵmatýlın VI saılanǵan Parlamenttiń tórtinshi sessııasy óz jumysyn aıaqtaǵanyn jarııalap, sessııa jumysynyń nátıjesi Senat pen Májilistiń, Úkimettiń, eki Palata apparatynyń qyzmetkerleri men aqparat quraldary ókilderiniń birlesip atqarǵan eleýli eńbekteriniń jemisi ekenin aıtyp, alǵysyn jetkizdi.

Aıta keteıik, sessııa aıaqtalǵanymen, depýtattardyń halyqpen kezdesýi úshin aımaqtarǵa sapary bastalady.