Qulaǵan Keńes ımperııasymen birge qıraǵan elimizdiń aýyr jaǵdaıyn bárimiz basymyzdan keshtik. Joqshylyq pen tapshylyqtan taryǵyp, tirshiligi toqtap qalyp, údere kóshken aýyl jurtynan qalmaı, qalaǵa aǵyldyq. Áldekimderdiń shamasy megapolısterge qonys aýdarýǵa jetti. Olardan ortalaýlary oblys ortalyqtaryna ornalasty. Biz sekildi joq-juqanalar elsiz, egesiz shaǵyn qalashyqtardy panalap, qarbalasy toly úlken aýylǵa aınaldyrdy.
Áli kúnge esime alsam, tóbe shashym tik turyp, quıqam shymyrlaı jóneledi.
Qalaı kún kórdik? Ne jaryq joq. Ne jylý joq. Ne sý joq. Ne jalaqy joq. Balkondarymyzǵa qoıǵan peshterimizge eski-qusqy aıaq-kıimdi jaǵyp, as-aýqat pisirgen kúnder umytylar ma? Sóıtip júrip aıaqtaryn apyl-tapyl basqan eki egiz ulymnyń sońynan dúnıege taǵy náreste keldi. Balabaqshalar jabylyp qalǵan. Emizýli bóbegimizdi kóterip júrip te jumystan qol úzbedik. Aılap, jyldap aılyq almaǵannan kúder úzip, mektepti tastap, bettiń aryn belge túıgen keıbir muǵalim qurbylarym qusap qap arqalap, Qarataý men Aqmola, Novosibir aralap ketpesem de, naryqtyq ekonomıka óz degenine kóndirgen. Naryq óz zańyna baǵyndyrsa da, ilgergi úmitten kóz jazǵyzǵan joq. О́ıtkeni men de qalyń kópshilik sekildi memleketimizdi bastap alyp kele jatqan basshymyzǵa sendim.
Ol – «Qazaqstandy qazaq basqarsyn!» dep Jeltoqsannyń muzǵa jaqqan alaýynyń arqasynda, halyq qalaýymen bılik basyna kelgen N.Nazarbaev bolatyn.
Táýekelge basyn tikken Nursultan Nazarbaevtyń ornynda basqa bireý bolǵanda memleketimizdiń hali neshik bolatynyn kóz aldyma elestete almaımyn. О́ıtkeni birde qatty aıtyp, birde jumsartyp, birde arqadan qaǵyp, birde qamshylap otyryp, halqyn ekonomıkalyq tyǵyryqtan aman-esen alyp shyǵyp, endi ǵana aıaǵyna turǵan sábıdeı áljýaz jas memleketin ydyraý men quldyraýdan saqtap qalǵan Nursultan Ábishulynyń ólsheýsiz eńbegin áste joqqa shyǵarýǵa bolmaıdy.
Ol – tóńkerilip ketkendeı astan-kesten dúnıede qazaǵymyzǵa kezikken bul aýyr synaqtan súrindirmeı ótkizip, jahandyq syn-qaterler týǵyzyp jatqan álemdik tártiptiń turaqsyzdyǵynan zardap shektirmeýge meılinshe tyrysyp, damýdyń qazaqstandyq jolyn salyp bergen adam. Altaı men Atyraýǵa deıin alyp jatqan ulan-ǵaıyr Uly dalamyzdyń shekarasyn shegendep turyp bekitip bergen adam. Abylaı babamyz armandaǵan astanany saldy. Bes qurlyqqa uıalmaı kórsete alatyn ǵajaıyp shahar. Soǵyssyz otyz jyl basqaryp, elge beıbit zaman ornatty. Tatýlyqty saltanat qurǵyzdy. О́rkenıetti elý eldiń qataryna qosty.
Táýelsiz memleketimizdiń irgetasyn kóterip, negizin qalaǵan Elbasy el halqyn ǵana emes, dúnıe júzin tańǵaldyryp, bılikti berýdiń ózindik úlgisin júzege asyrdy. Álemdik qaýymdastyqtaǵy saıası bet-bedeli joǵary, Shyǵys pen Batys elderindegi, Islam álemindegi, Túrki elderindegi, Ortalyq Azııadaǵy, TMD aýmaǵyndaǵy abyroı-ataǵyna eshkim de, eshbir alpaýyt memleketter de kóz jumbaılyqpen qaraı almaıtyn, Qazaq deıtin halyqtyń álem jurty aldyndaǵy bedeli men abyroıy úshin parasat bıiginen kórine bilgen, ult bolashaǵy úshin uly qadam, úlken erlik, salmaqty sheshim jasaǵan N.Nazarbaevtyń esimi memleketimizdiń tarıhynda sózsiz altyn árippen jazylady.
Tuńǵysh Prezıdent – Elbasy, Qaýipsizdik Keńesiniń Tóraǵasy, Nur Otan partııasynyń Tóraǵasy, Konstıtýsııalyq Keńestiń múshesi, el qamy, halyq qamyn óz múddesi sanaıtyn, basshylardyń jańa býynynyń bılikke kelýin qamtamasyz etýdi óz mindeti dep sanaıtyn Nursultan Ábishuly mine, men úshin osyndaı uly tulǵa.
Endeshe, Elbasynyń elimiz úshin etken eńbegi qurmetteýge turarlyq. «Adamdar bizdiń jaqsylyǵymyzdy umytady, biraq istegen qatelikterimizdi esinde máńgi saqtaıdy» degen paıǵambarymyz Muhammed (s.ǵ.s.)-nyń sózin jadymyzda ustasaq, qoı ústine boztorǵaı jumyrtqalaǵan osynaý ýaqytymyzdyń qadirin túsinermiz.
Sol paıǵambarymyz Muhammed (s.ǵ.s.) aıtqandaı, «Sanasy qanshalyqty tómen bolsa, murnyn sonshalyqty aspanǵa shúıiretin adamdardyń da» tabylyp qalatynyn eskersek, arandap, adasýshylyqqa da túspesimiz aıan.
Ǵulama Júsip Balasaǵun aıtyp ketkendeı, «Negizi eń kúshti adamdar – sabyrly, salmaqty adamdar. Siz týraly jaman oılaıtyndar – sizden álsiz adamdar. Myqty adamdardyń siz jaıly oılaýǵa ýaqyttary da joq» ekenine kózimiz jeter edi.
Úmit BITENOVA,
Qazaqstan Jazýshylar odaǵynyń múshesi
