«Iаpyraı», «Bir arpa bıdaı», «Shápıbaıaý», «Tileýqabaq», «Eki jıren», «Aq qýraı», «Baıanaýyl», «Surjekeı» syndy halyq ánderine qosa Aqan seriniń «Syrymbet», Segiz seriniń «Qarǵash», Mádı Bápıulynyń «Qarakesek», Estaıdyń «Qusnı-Qorlan», Jaıaý Musanyń «Aq sısa», Abaı Qunanbaıulynyń «Kózimniń qarasy», Muhıt Meralyulynyń «Aınamkóz», Zilqara Baıtoqaulynyń «Jıyrma bes» shyǵarmalary, aspaptyq týyndylardan M.Tólebaevtyń skrıpkaǵa, K.Kúmisbekovtiń vıolonchelge arnalǵan poemalary, Á.Mámbetovtiń Trıo-Elegııasy syrshyl da sazdy sıpatta oryndalyp, sezim tolqynyndaǵy án jelkeni jan terbedi.
Álemniń 50-den astam elinde sheberlik synybyn ótkizip, qazaq ulttyq opera óneriniń damýyna ólsheýsiz eńbek sińirgen Shahımardan Ábilovtiń kim ekenin taǵy bir márte áıgilep aıtyp jatý, artyq bolar, sirá. Deı turǵanmen Ahmet Jubanov pen Latıf Hamıdıdiń «Abaı» operasyndaǵy ol somdaǵan Abaı beınesi búginde qazaq ulttyq opera óneri tarıhyndaǵy shoqtyǵy bıik aıtýly partııa retinde joǵary baǵalanatynyn, aqynnyń uly júreginiń mahabbatyn, ishki jan tebirenisin, tolǵanys-tolqýy men arman-ańsaryn asqaqtata shyrqap, áýpildekteı áýeletken ár sátin kópshilikke ónege ete júrsek, munyń ózi keıingi óskeleń urpaq úshin máni zor ónege bolmaq. Shahımardan Ábilov beıneleýindegi Abaı murasy buǵan deıingi súrleý-soqpaqqa uqsamaıtyn ózgeshe sulý órnegimen, baısaldy da symbatty kúıimen erekshelenip, kóńildi árdaıym syrshyl sazben kómkerip turatyndyǵy eń aldymen, qaı shyǵarmany da onyń kóńil bezbenine salyp, júrekpen oryndaýynda. Al Verdıdiń «Rıgoletto», «Travıata» jáne «Aıda» spektaklderindegi Rıgoletto, Jermon, Amonasro, Chaıkovskııdiń «Qarǵanyń mátkesindegi» – Tomskıı, Rımskıı-Korsakovtyń «Patsha qalyńdyǵyndaǵy» – Grıaznov, Erkeǵalı Rahmadıevtiń «Abylaı hanyndaǵy» Buqar jyraý syndy shoqtyǵy bıik partııalary óz aldyna bólek ıirim, álemdik hám otandyq rýhanı qazynany qatar ıgerýdegi san taraý iri jetistik der edik.
Túrkııa Prezıdenti S.Demıreldiń bastamasymen sahnalanǵan «Ararat týraly ańyz» operasyndaǵy Ahmet rólin túbi túrki jurtynan túrik tilinde saıratqan tuńǵysh qazaǵyńyz da, túrik baýyrlardyń «Kóroǵly» operasyna arnaıy shaqyrtylyp, bas partııany oryndaǵan tulǵańyz da mine, osy ánshi ekenin bireý bilse, búginde bireý bile bermeýi múmkin-aý!
Italııan, orys, nemis, t.t. sol sııaqty nebir álemdik án mektepterin sheber meńgere júrip, ózińniń halqyńnyń jan dúnıesine etene jaqyn, HIH ǵasyrdyń ózinde-aq kásibı turǵyda kemeldikke jetken qazaq ulttyq án mektebin árdaıym qadir tutyp ótýdi, qaı sahnada bolsyn tól murany, dala mádenıetin basqa órkenıettiń mádenıetinen oq boıy ozdyrtyp, mereıin ústem etýdi ómirlik ustanymǵa aınaldyrǵan ánshi Londonnyń áıgili Barbıkan ortalyǵynda, Parıjdiń eń myqty Pleıel zalynda, Máskeýdegi Kompozıtorlar odaǵy zalynda, Chaıkovskıı atyndaǵy konservatorııanyń Kishi zalynda, ásirese halyq ánderin úzildire shyrqaǵanda ondaǵy halyq oryndarynan óre túregelip, qazaqtyń halyq ánderiniń keremettigine tańdaı qaqqanyn ánshiniń óz aýzynan estip qalǵan jaıymyz bar.
Bul týraly ózi: «Sheteldegi sondaı bir kezekti konsertten keıin tanymal bir tulǵa kelip: «Mynaý netken ǵajap dúnıe! Álginde oryndaǵan tamasha týyndyńyzdyń avtory kim, kompozıtory kim? Mundaı klassıkalyq úlgidegi halyqtyq shyǵarmany alǵash ret estýimiz» dep án tarıhyn qyzyǵa surastyryp, súısinis bildirdi» dep jazdy.
Al «Astana Opera» teatrynyń jetekshi solısi Jupar Ǵabdýllınanyń vokaldyq, sahnalyq sheberligi, daýys ereksheligi kópshilikke keńinen málim desek, jaqynda ǵana ol Túrkııada ótken Halyqaralyq Ystanbul opera jáne balet festıvaliniń mereıtoılyq onynshy ashylý saltanatyna qatysyp qaıtty. Dj.Pýchchınıdiń «Týrandot» operasyndaǵy basty partııany oryndaǵan qazaq ánshisine sarapshylar joǵary baǵa berdi. «2500 orynǵa shaqtalǵan Zorlu PSM Studio konsert zalynda ıne shanshar oryn bolǵan joq», dep jazdy bul týraly jergilikti basylymdar.
Jýrnalısterge bergen suhbatynda Jupar Ǵabdýllına konserttiń ereksheligi týraly aıta kelip:
– Sebebi opera ánshisi úshin kameralyq mýzykanyń orny qashanda bólek, – dedi. – Qurmanǵazy atyndaǵy konservatorııanyń aspırantýrasynda Shahımardan aǵanyń synybynda oqydym. Sol sebepti kameralyq zalda ustazymmen birge óner kórsetý baqytyna ıe bolǵanyma qýanyshtymyn.
Ekinshiden, kórermenge qazaq halqynyń tól týyndylaryn oryndaý, syrnaı, dombyra aspaptarynda shyrqalǵan kóne dúnıelerdi, sal-seriler men dala kompozıtorlarynyń shyǵarmalaryn usyný baǵa jetpes baılyqty úlgi tutý dep esepteımin. Ulan-ǵaıyr, keń-baıtaq ólkemizde týǵan baıyrǵy sansyz saryndy udaıy dáriptep otyrý – árbirimizdiń basty paryzymyz. Ata-babalarymyzdan qalǵan osynaý asyl murany, urpaqtan-urpaqqa aýyzsha saqtalyp jetken jaýhar týyndylardy klassıkalyq úlgide jańǵyrtý jobasy munan keıin de ári qaraı jarasymdy jalǵasyn taba bererine senemin.
Klassıkalyq mýzyka keshinde sondaı-aq Qazaqstannyń eńbek sińirgen ártisi Maqpal Bekmaǵambetova (skrıpka), Asqar Muqanov (vıolonchel), Raýshan Beskembırova (fortepıano) óner kórsetti.
