Sazgerdiń týǵan jerinde jyl saıyn ótkiziletin án baıqaýyna jergilikti ánshilerden bólek Nur-Sultan, Almaty, О́skemen, Taraz, Aqtóbe, Qostanaı, Qaraǵandy, Atyraý, Qyzylorda qalalarynan, О́zbekstan Respýblıkasy quramyndaǵy Qaraqalpaq Respýblıkasynyń astanasy Nókis shaharynan kelgen úmitker qatysýda.
Halyqaralyq «Atameken» án festıvaliniń Hadısha Bókeeva atyndaǵy Batys Qazaqstan oblystyq qazaq drama teatrynda ótken ashylý saltanatynda oblystyq mádenıet basqarmasynyń basshysy Qadyrbolat Musaǵalıev sóz sóılep, dástúrge aınalǵan án baıqaýynyń bıylǵy ereksheligi – úmitkerlerdiń estradalyq vokal jáne romans janrynda án salatynyn aıtty.
- Keler jyly bizdiń Eskendir aǵamyz 80 jasqa tolady. Sonymen birge áıgili «Atameken» ániniń jaryqqa shyqqanyna da 50 jyl tolady. Sondyqtan aldaǵy jyly Aq Jaıyq óńirinde aýqymdy sharalar mol bolmaq, - dedi Qadyrbolat Musaǵalıev.
Festıvalge Eskendir Hasanǵalıev aǵamyzdyń ózimen birge uly, Qazaqstan Respýblıkasynyń eńbek sińirgen qaıratkeri, ánshi-kompozıtor Birjan Hasanǵalıev arnaıy qonaq retinde kelgen. Qazylar alqasynyń quramynda sondaı-aq Qazaqstan Respýblıkasynyń eńbek sińirgen artısi, Ǵarıfolla Qurmanǵalıev atyndaǵy Batys Qazaqstan oblystyq fılarmonııa ánshisi Jumaǵanym Rahımova, Qanatqalı Qojaqov jáne IV Halyqaralyq «Atameken»án festıvaliniń júldegeri, ánshi-kompozıtor Tańat Jeksenbaev bar.
Baıqaý qorytyndysy 17 shilde kúni shyǵady. Jeńimpazdar arnaıy dıplom, statýetka jáne aqshalaı syılyqtarmen marapattalady.
Batys Qazaqstan
