Oblys ákimi máseleni anyqtap, sheshý joldaryn qarastyrdy. Aýdan basshysy Mádı Eleýsizovke Belqopa aýylyndaǵy jóndeýi aıaqtalmaǵan eki birdeı uńǵymanyń jobalyq smetalyq qujattaryn jınaqtap, tez arada aýyl turǵyndaryn aýyz sýmen qamtý máselesin sheshýdi tapsyrdy. Al, Jarótkel aýyly bıyl gazben qamtylady.
Áıteke bı aýdanynda 2018 jyly oblystyq bıýdjet esebinen jalpy quny 376,6 mln teńgeni quraıtyn 2 gazben jabdyqtaý nysandary júzege asyrylyp, paıdalanýǵa engizilgen. Sonymen qatar respýblıkalyq jáne oblystyq bıýdjetten qarjylandyrýmen 5 gazben jabdyqtaý jobalaryn júzege asyrý bastaldy. Jobalardyń ishinde osy Jarótkeldi aýylishilik gaz qubyrymen qamtý qarastyrylǵan. Atalǵan 5 jobany 2019-2020 jyldary paıdalanýǵa berý josparda. Ońdasyn Orazalın Qarabutaq aýylyndaǵy «Áıteke bı týberkýlez aýrýlaryna arnalǵan hospıs» ǵımaratyn aralady. Aýrýhanada týberkýlezdiń sozylmaly túrimen aýyratyn naýqastardyń sımptomatıkalyq emi júrgiziledi.(Dıspanserlik eseptiń IG toby) Bul toptaǵy naýqastar qorshaǵan ortaǵa qaýip tóndirmeıdi. Em alýshylar sanynyń azdyǵyna baılanysty mundaǵy naýqastar Temir aýdanyndaǵy týberkýlezge qarsy bólimge aýystyrylyp, ǵımarat jabylady. 3 qabatty nysandy bolashaqta basqa maqsatta paıdalaný josparda bar, ol úshin oblys ákimi densaýlyq saqtaý basqarmasynyń basshysy Áset Qalıevke naqty usynystar ázirleýdi tapsyrdy. Sondaı-aq Ońdasyn Orazalın hospıste jumys jasaıtyn 35 dárigerdiń jumyssyz qalmaýyn, olarǵa ótemaqy tólenýin, eńbek demalystaryn uıymdastyrý qajettigin aıtty.
Aýyl turǵyndaryn sybaılas jemqorlyqpen kúresýde birge at salysýǵa shaqyrǵan Aqtóbe oblystyq sybaılas jemqorlyqqa qarsy departamenti Ulttyq bıýrosynyń basshysy Mırlan Muhambetov oblys basshysymen birge jergilikti turǵyndardy adaldyq alańynyń jumysymen, sońǵy kezderi engizilip jatqan jańa júıelerimen tanystyrdy. 2 baǵytta jumys jasaıtyn adaldyq alańynyń maqsaty turmystyq sybaılas jemqorlyqty joıyp, azamattarǵa qolaıly jaǵdaı jasaý. «Adaldyq alańynyń» mamandary qazirde memlekettik mekemelerde «Open space» kabınetteriniń ashylýy boıynsha jumystar jasaýda. Oblys basshysy Qarabutaq aýyly turǵyndarymen kezdesip, jeke qabyldaýlar ótkizdi. Jergilikti halyq oblys ákimine aýyldan qoqys tógetin arnaıy polıgonnyń ashylýyn surady. Ońdasyn Orazalın ekologııa basqarmasynyń basshysyna turǵyndardyń ótinishin tez arada sheshýdi tapsyrdy. Is sapar sońynda óńir basshysy aýdan ákimine Áıteke bı aýdanynda kásipkerlik salasyn damytýdy, qosymsha jumys kózderin kóbeıtýdi, mádenı-rýhanı sharalardy jandandyrýdy barlyq salada jumystardy damytýdy tapsyrdy.
