2020 jylǵy Olımpıada oıyndarynda álemniń barlyq memleketinen 11 090 sportshy qatysady. Osy oraıda, erler men áıelder teńdigi saqtalǵanyn aıta ketý kerek. Jalpy qatysýshylardyń 49 paıyzyn áıelder quraıdy.
Olımpıada oıyndarynda 33 sport túrinen 339 medaldar jıyntyǵy taratylady. Al mýltısporttyq dodany uıymdastyrýǵa 200 myńnan asa eriktiler kómektesedi.
Olımpıadalyq sport túrlerinen halyqaralyq federasııalar oıynǵa qatysatyn atletterdi irikteýden ótkizý júıesin birshama qıyndatty. Negizinen, sporshylardy reıtıng arqyly irikteý júıesi qoldanysqa endi. Atap aıtar bolsaq, jeńil atletıka, aýyr atletıka, karate syndy sport túrlerinde tórtjyldyq dodasyna irikteý kezeńi reıtıng arqyly eseptelýde.
Jyl basynan beri álem sportshylary Olımpıada lısenzııasyna talasty bastaldy. Sporttyń barlyq túrleri boıynsha 2020 jylǵy oıyndarǵa irikteý kezeńi bastalyp ketti.
Qazaqstan komandasy sapynan Tokıo oıyndarynyń alǵashqy joldamasyn jeńil atlet Georgıı Sheıko ıelendi. Ol naýryz aıynda ótken Azııa chempıonatynda sporttyq jaıaý júristen kúmis júlde jeńip aldy. Sheıkonyń ýaqyt kórsetkishi – 1 saǵat 20 mınýt 21 sekýnd. Bul 1 saǵat 21 mınýtqa saı keletin Olımpıada normatıvi úshin jetkilikti kórsetkish.
Sáýir aıynda #TEAMKZ qorjyny taǵy eki lısenzııamen tolyqty. Ashyq sýda júzýden Kýveıtte ótken Azııa chempıonatynda Vıtalıı Hýdıakov altyn júldeger atanyp qana qoımaı, Olımpıada joldamasyna ıelik etti. Ol 10 shaqyrymǵa júzýden Tokıo oıyndarynyń lısenzııasyna qol jetkizgen.
Birneshe kúnnen soń júzýden Olımpıada chempıony Dmıtrıı Balandınge joldama buıyrdy. Ol Gýandjoýda ótken Champions Swim Series týrnıriniń birinshi kezeńinde 200 metrge brass ádisimen júzýden lısenzııa utyp aldy. Al shilde aıynda Dmıtrıı 100 metrge brass ádisimen júzýden taǵy bir joldamany qorjynǵa saldy. Kvandjýda ótip jatqan sý sporty túrlerinen álem chempıonatynyń jartylaı fınalynda Balandın Olımpıada normatıvin oryndaǵan bolatyn.
30 maýsym kúni jeńil atletıkadan ulttyq qurama úzdigi Olga Rypakova Almatyda ótken lısenzııalyq Qazaqstan kýboginde joldamaǵa ıelik etti. Rypakova úsh qarǵyp sekirýden 14.37 nátıjesin kórsetip, óziniń tórtinshi Olımpıadasyna joldama aldy.
Sondaı-aq, 2020 jylǵy Tokıo Olımpıadasyna joldama utyp alǵandar qatarynda sadaq atýdan Qazaqstan komandasy bar. Sanjar Musaev, Denıs Gankın jáne Ilfat Abdýllın Hertogenbosta (Nıderland) ótken álem chempıonatynda altynshy oryn ıelenip, Olımpıada oıyndaryna joldama jeńip aldy. Sondaı-aq, sportshylar jekeleı synda óner kórsetedi.
Bul ázirge bastamasy ǵana. Bir jyl
boıy sportshylar Tokıo oıyndarynyń joldamasyn jeńip alý úshin aıanyp qalmaıdy.
