Mekeme basshysy Aıdar Nyǵmetov sharýashylyqtyń basty maqsaty óndirilgen klasterdi buzaýdan daıyn ónimge deıin jetkizý jáne memlekettik baǵdarlamalar men ınvestorlar arqyly eksportqa shyǵý ekenin atap ótti.
Rashıt Ákimov mal sharýashylyǵy salasyn damytýmen aınalysatyn seriktestiktiń qyzmetine oń baǵa berdi.
Senat depýtattary «Hamze» sharýa qojalyǵynyń 400 bas sımmental asyl tuqymdy iri qara maly bar sút fermasynda da boldy. 2017 jyldyń mamyr aıynda iske qosylǵan fermany damytýǵa 400 mıllıon teńge nesıe berilgen bolatyn. Ferma dırektory senatorlardy «Hamze» aýyl sharýyshylyq sút fermasynyń barlyq jumys qurylymymen tanystyrdy.
Senatorlar Aqsýat aýylyndaǵy «Aizet Farms» seriktestiginde de boldy. Munda «Agrobıznes» baǵdarlamasy boıynsha Aýstralııadan 2200 bas asyl tuqymdy Aberdeen Angus maly ákelingen bolatyn. R. Ákimov atalǵan kásipkerlik sýbektileriniń odan ári tabysty damýy úshin olarǵa tolyqtaı memlekettik qoldaý bolatynyn, onyń ishinde sýbsıdııalar túrinde beriletinin aıtty.
Senat depýtattary Rashıt Ákimov pen Dáýren Ádilbekov jumys saparymen Arshaly aýdanyndaǵy Mıhaılov aýyldyq okrýginde aýyl sharýashylyǵy taýaryn óndirýshilermen kezdesti. Atap aıtqanda, jeke ınvestısııalardyń úlesi, eńbek ónimdiligin arttyrý, aýdannyń agroónerkásip salasy boıynsha memlekettik baǵdarlamalaryn iske asyrý máseleleri qozǵaldy.
