О́ndiris oshaǵynyń tarıhy 2015 jyly Tarazdaǵy avtoturaq aýmaǵynan tys qalǵan jerdi satyp alýdan bastalypty. Fabrıka basshysy Sáýle Satybaldıeva kásiporyn ǵımaratynyń birin qaıta qurý jumystaryn qolǵa alyp, vaflı ázirleý boıynsha aýstralııalyq NAAS kompanııasynyń jabdyqtaryn satyp alýǵa kelisim jasaıdy. Ol «Bıznestiń jol kartasy» baǵdarlamasy arqyly 1,2 mlrd teńge kóleminde nesıe alǵan-dy. 2017 jyldyń sońynda montajdaý jáne iske qosý jumystary júrgizildi, al 2018 jyldyń basynda ruqsat berý qujattaryn alǵannan keıin fabrıkanyń alǵashqy ónimderi saýda jelileriniń sórelerine túse bastaǵan.
Búginde múmkindigi mol. Fabrıkanyń óndiristik qýaty aıyna 250 tonna daıyn ónimdi quraıdy. Kompanııanyń birinshi bóligi iske qosylǵan mezetten bastap táttiniń 34 túri shyǵarylyp, tutynýshylardyń kózaıymyna aınaldy. Qazirgi tańda 30 adamdy jumyspen qamtyp otyr.
Sapa turǵysynan sheteldiń brendterinen kem túspeıtin «Sáýle» fabrıkasyna syrtqy seriktester qyzyǵýshylyq tanytyp, byltyr kúzde Qytaı naryǵyna shyqty.
Fabrıka Jambyl oblysy kásipkerler palatasynan taýardyń shyǵý tegi sertıfıkatyn aldy. ST-KZ sertıfıkaty taýardyń Qazaqstan Respýblıkasynyń aýmaǵynda shyǵý tegin rastaıdy, bul óz kezeginde jetkizýshige jeńildikti sharttarda ótkiziletin barlyq satyp alýǵa qatysýǵa múmkindik beredi.
Endi atalǵan seriktestik bolashaqta Azııa elderine ǵana emes, ónim assortımentin teńiz asyp Eýropa naryǵyna shyǵarýdy, óndiris kólemin ulǵaıtýdy, qanatyn keńirek jaıyp, basqa da osyndaı óndiris oshaqtaryn ashyp, jelilerin kóbeıtýdi kózdep otyr. Jastyǵyna qaramastan, aýqymdy ispen shuǵyldanýǵa batyl kirisken kásipker Sáýle Satybaldıevanyń maqsaty – fabrıkanyń jańa korpýsyn salý, shokolad pen karamelden jasalǵan kondıterlik ónimder shyǵaratyn jańa jelilerdi satyp alý. «Sáýleniń» jelileri paıda bolyp, qýaty kúsheıgennen keıin shtattaǵy adamdar sanyn 200 adamǵa deıin keńeıtý jospary bar.
Bıylǵy jyldyń sońyna deıin jańa óndiris ǵımaratyn salý jáne jańa óndiristik jeli satyp alý josparlanyp otyr. Qazirgi zamanǵy jabdyqtardy engizý kásiporynnyń qýatyn 4500 tonnadan 12 000 tonnaǵa deıin arttyrýǵa jáne ónimdi eksportqa kóbirek shyǵarýǵa múmkindik beredi.
