Bıyl ekinshi ret ótip otyrǵan aıtýly is-sharaǵa elimiz óńirlerinen otandyq ǵylymdy damytýǵa aıryqsha úles qosyp júrgen ǵalymdar qatysty.
Kórnekti ǵalym, fızıolog Náılá Bazanovanyń esimi Ortalyq Azııa elderine alǵashqy áıel-akademık, qazaq áıelderi arasynan shyqqan tuńǵysh bıologııa ǵylymynyń doktory, professor retinde belgili. Akademık N. Bazanova atyndaǵy marapat – Qazaqstan ǵylymynyń damýyna eleýli úles qosyp júrgen ǵalym áıelderdi marapattaýǵa arnalǵan qurmet belgisi. Marapat ǵylym men tehnologııanyń úzdiksiz damýyn jáne akademık zertteýlerindegi jańashyldyqty beıneleıdi.
Saltanatty jıynda Prezıdent janyndaǵy UǴA prezıdenti Aqylbek Kúrishbav búgingi kúni ǵylym salasynda tabandylyqpen eńbek etip júrgen názik jandylardy kóktemmen birge kelgen jylýlyq pen sulýlyq merekesimen quttyqtady.
– Elimizdiń ekonomıkalyq damýyn ǵylymnyń qatysýynsyz damytý múmkin emes. Osy oraıda Memleket basshysy ǵylym salasyna orasan zor mindetter júktep otyr. Bul zertteý qyzmetin uıymdastyrýǵa degen kózqarasty ózgertip, ǵylymdy basqarý organdarynyń mindetterin naqtylaýǵa jáne ǵalymdy óziniń zııatkerlik áleýetin tolyq ashýǵa yntalandyratyn jańa tetikter jasaýǵa mindetteıdi. Jaýapkershiligi joǵary mindetti iske asyrýda ǵylymı qoǵamdastyqtyń áıelder qaýymyna erekshe senim artamyz. «Jumaq – Ananyń izinde, shýaq – Ananyń kózinde» degen támsilge nazar aýdarar bolsaq, názik jandylar bilim men ǵylymnyń damýyna, qoǵamnyń zııatkerlik áleýetin arttyrýǵa súbeli úles qosyp, urpaq tárbıelep júr. Jyl saıyn ǵylymdaǵy áıelder úlesi artyp búginde kórsetkish 12 myńnan asady. Olardyń qatarynda ǵylym doktorlarynyń sany – 898, ǵylym kandıdattary – 2 859, PhD – 2 229 jáne beıini boıynsha doktorlar – 185. Ǵylymdy damytýǵa baǵyttalǵan keshendi josparda ǵalym áıelderge túsetin salmaq ta, jaýapkershilik te joǵary. Biraq osyndaı kúrdeli mindetti iske asyrýda názik jandylar óz isine degen adaldyqpen el damýyna keleli úles qosyp keledi, – dedi UǴA prezıdenti.
Alqaly jıyn barysynda Almaty qalasy ákimi Darhan Satybaldynyń quttyqtaýyn Jastar saıasaty basqarmasynyń basshysy Ázız Qajdenbek jetkizip, ǵylymdy qoldaýǵa baǵyttalǵan jobalar týraly aıtyp ótti. Al izgi lebizin arnaǵan UǴA akademıgi Dılıara Qaıdarova, Qazaq ulttyq qyzdar pedagogıkalyq ýnıversıtetiniń rektory Beıbitgúl Kárimova qoǵamdaǵy ǵalym áıelderdiń róli, jetistigine toqtaldy.
Aqmaral Álnazarova mereke qarsańynda medısına qyzmetkerlerin marapattady
Saltanatty jıynda Abaı atyndaǵy QazUPÝ professory Faýzııa Orazbaeva, R. Súleımenov atyndaǵy Shyǵystaný ınstıtýty janyndaǵy respýblıkalyq aqparattyq ortalyq dırektory, professor Merýert Ábýseıitova, Almaty tehnologııalyq ýnıversıtetiniń professory Marııam Alımardanova, ál-Farabı atyndaǵy QazUÝ professory Tamara Shalahmetova, Seısmologııalyq baqylaýlar men zertteýler ulttyq ǵylymı ortalyǵynyń ınjenerlik seısmologııa zerthanasynyń meńgerýshisi Natalıa Sılacheva, Sh. Ýálıhanov atyndaǵy Tarıh jáne etnologııa ınstıtýtynyń bas ǵylymı qyzmetkeri, professor Zakısh Túleýhanova, Mıkrobıologııa jáne vırýsologııa ǵylymı-óndiristik ortalyǵynyń mıkrobıologııa bóliminiń jetekshisi Gúl Baımahanova, Saǵadat Nurmaǵambetov atyndaǵy Qurlyq áskerleri áskerı ınstıtýtynyń bólim bastyǵy Janat Bısenbaeva, Jáńgir han atyndaǵy Batys Qazaqstan agrarlyq-tehnıkalyq ýnıversıteti departament dırektory Indıra Beıshova, Ǵumarbek Dáýkeev atyndaǵy Almaty energetıka jáne baılanys ýnıversıtetiniń «Kıberqaýipsizdik» kafedrasynyń meńgerýshisi Eńlik Begimbaeva syndy 60-tan astam ǵalym marapattaldy.
Marapat otandyq ǵylymdaǵy názik jandardyń jetistikterin moıyndaý, dáripteý jáne jas ǵalymdardy yntalandyrý maqsatynda taǵaıyndaldy. Akademıktiń ǵylymı murasy jas ǵalymdarǵa úlgi-ónege.
ALMATY
