Onyń aıtýynsha, bul tabysqa qatysty qatań shekteý engizý degendi bildirmeıdi. Degenmen bankter árbir azamattyń táýekel deńgeıin eskerýge mindetti bolady.
«Bul naqty bir shekteý emes. Bul – táýekelderdi basqarý júıesi arqyly iske asatyn tetik. Bankter qaryz alýshynyń tabysyn baǵalap, onyń tólem qabilettiligine qaraı sheshim qabyldaýy tıis», dedi agenttik basshysy.
2 jáne 5%-dyq ıpoteka: Jeńildetilgen nesıe kimderge beriledi jáne ony qalaı alýǵa bolady?
Ábilqasymovanyń sózinshe, ıpoteka boıynsha jalpy táýekel deńgeıi tómen bolǵanymen, 2020 jyldan keıin berilgen nesıeler boıynsha merzimi ótken tólemder sany artyp keledi. Ásirese joǵary paıyzdyq kezeńde rásimdelgen ıpotekalarda táýekeldiń óskeni baıqalǵan.
«Sońǵy jyldary joǵary paıyzdyq mólsherleme kezinde berilgen ıpotekalar boıynsha táýekel kórsetkishiniń artqanyn kórip otyrmyz. Sondyqtan bankterge táýekeli joǵary qaryz alýshylarǵa nesıe bermeý jóninde naqty talap qoıylyp otyr», dedi ol.
Bul ózgeris is júzinde tabysy tómen azamattar úshin naryqtyq ıpotekaǵa qoljetimdiliktiń qıyndaı túsýine áser etýi múmkin. Degenmen retteýshi organ turǵyn úıdiń qoljetimdiligin arttyrý baǵytyndaǵy qosymsha sharalar da qatar qarastyrylyp jatqanyn atap ótti.
Agenttik basshysynyń aıtýynsha, qazirgi tańda jeńildetilgen ıpotekalyq baǵdarlamalar árdaıym naqty muqtaj azamattarǵa baǵyttala bermeıdi.
«Jeńildetilgen ıpotekalyq ónimderge ártúrli sanattaǵy azamattar qol jetkizip otyr, olardyń ishinde naryqtyq sharttarmen de nesıe ala alatyndar bar. Sondyqtan bul baǵdarlamalardyń maqsatty baǵyttalýyn kúsheıtý qajet», dedi Mádına Ábilqasymova.
Bılik endigi ýaqytta memlekettik qoldaýdy shyn máninde ıpoteka ala almaıtyn, áleýmettik turǵydan osal azamattarǵa baǵyttaýdy josparlap otyr.
Sonymen qatar turǵyn úı-qurylys jınaq júıesin damytý jáne kommersııalyq bankter arqyly naryqtyq ıpotekany jetildirý kózdelgen.
Mamandardyń pikirinshe, negizgi maqsat – ıpotekalyq saıasatty teńgerimdi etý: turǵyn úıdiń qoljetimdiligin saqtaý, baǵanyń shamadan tys ósýine jol bermeý jáne halyqtyń artyq qaryz júktemesine túsýiniń aldyn alý.
