Foto: primeminister.kz
Taraptar senim men kásibılikke negizdelgen strategııalyq áriptestiktiń joǵary deńgeıin atap ótti. 1993-2026 jyldar aralyǵynda kólik, bilim berý, ekologııa, «jasyl» tehnologııa jáne sıfrlandyrý salalarynda 8 mlrd dollardan astam qarjyǵa 50-den asa joba iske asyrylǵan.
Dúnıejúzilik bank Qazaqstandaǵy ekonomıkalyq reformalardy ilgeriletýge, ınfraqurylymdy damytýǵa jáne makroekonomıkalyq ári fıskaldyq turaqtylyqty qamtamasyz etýge mańyzdy úles qosyp keledi.
Kezdesý barysynda Serik Jumanǵarın sońǵy jyldardaǵy sheshýshi qadamdardyń biri – bıýdjet-salyq reformasy ekenin atap ótti. Onyń aıtýynsha, reformanyń tıimdiligi bıylǵy birinshi toqsan qorytyndysymen rastalǵan.
2026-2030 jyldarǵa arnalǵan jańa áriptestik strategııasynda yntymaqtastyqtyń basym baǵyttary aıqyndaldy. Olardyń qatarynda:
– kólik jáne sıfrlyq baılanystardy damytý;
– sý jáne energetıka sektoryn jańǵyrtý;
– qarjy naryǵyn jetildirý;
– jeke ınvestısııa tartý;
– klımattyq kún tártibin kúsheıtý;
– jańartylatyn energııa kózderin keńinen paıdalaný bar.
Dúnıejúzilik bank 1 mlrd dollar bóldi: Ony Qazaqstan qaı maqsatta qoldanady?
Úkimettiń baspasóz qyzmetiniń málimdeýinshe, qazirgi tańda birlesken portfel aıasynda 2 iri joba júzege asyrylyp jatyr. Atap aıtqanda, quny 1 182,5 mlrd teńge bolatyn Qaraǵandy – Jezqazǵan avtojolyn qaıta jańartý jobasy (2025-2028 jyldar) jáne shamamen 84 mln dollar somasynda qarjylandyrýdy kózdeıtin «Qazaqstannyń ınklıýzıvti ekonomıkasy úshin jedeldetilgen sıfrlandyrý» jobasy.
Sonymen qatar, kólik, energetıka, sý resýrstary jáne sıfrlandyrý salalarynda taǵy 8 joba pysyqtalyp jatyr. Perspektıvaly bastamalar qatarynda Soltústik Aral teńizin qalpyna keltirý, «Beıneý – Sekseýil» avtojolyn salý jáne temirjol-kólik júıesin transformasııalaý jobalary bar.
Kezdesýde «Energetıkalyq jáne kommýnaldyq sektorlardy jańǵyrtý» ulttyq jobasyna erekshe nazar aýdaryldy. Bul bastama aıasynda 200-den astam tabıǵı monopolııa sýbektisin jańartý josparlanyp otyr, bul eldiń turaqty ekonomıkalyq ósimine tikeleı yqpal etpek.
Qazaqstan ekonomıkany ártaraptandyrý, sıfrlyq transformasııa jáne «jasyl» ósimge kóshý baǵytyn júıeli túrde júzege asyryp keledi. Osy rette Dúnıejúzilik bankpen yntymaqtastyqty odan ári keńeıtýge múddelilik bildirildi.
Dúnıejúzilik banktiń SPI-2024 reıtınginde Qazaqstan neshinshi orynda tur?
Antonella Bassanı uıymnyń barlyq talqylanǵan jobalardy iske asyrýǵa daıyn ekenin jetkizdi.
«Teńizge shyǵatyn jol joq bolýyna qaramastan, Qazaqstan aıtarlyqtaı áleýetke ıe bola otyryp, turaqty ósý qarqynyn kórsetip jatyr. Sonymen qatar, jahandyq ózgeris beıimdelý men ónimdilikti arttyrýdy talap etip otyr. Biz eldi ınfraqurylymǵa ınvestısııa salý arqyly da, reformalardy júzege asyrý arqyly da qoldaýǵa daıynbyz», dedi ol.
Sondaı-aq, energetıka men sý sektorlaryn jańǵyrtý yntymaqtastyqtyń eń aýqymdy jáne kapıtaldy qajet etetin baǵyttarynyń biri ekeni atap ótildi. Dúnıejúzilik bank bul salada memlekettik qarjylandyrýmen qatar, jeke ınvestısııa tartýǵa da járdemdesýge nıetti.
Taraptar aldaǵy mamyr aıynda josparlanǵan ınfraqurylymdyq ınvestısııalyq baǵdarlamalardy talqylaýdy qosa alǵanda, yntymaqtastyqty odan ári keńeıtýge daıyn ekenin rastady.
