Tergeý barysynda kúdiktiniń ózin tabysty kommersııalyq uıymnyń basshysy retinde tanystyryp, eki azamatty aldap, olardy usaq mal jetkizýge baılanysty jalǵan tabysty bıznes-jobaǵa qatysýǵa kóndirgeni anyqtaldy. Alaıda ol taýardyń bar ekeni jáne kompanııanyń qarjylyq múmkindikteri týraly ádeıi jalǵan aqparat bergen.
Qylmystyq jospardy júzege asyrý úshin zańdy kásipkerlik qyzmettiń jalǵan kórinisi jasalǵan: jalǵan kelisimsharttar rásimdelip, qoldan jasalǵan qujattar paıdalanylǵan, sondaı-aq bank nesıesin alý áreketteri jasalǵan. Nátıjesinde jábirlenýshiler nesıe rásimdep, iri kólemdegi qarajatty kúdikti baqylaýyndaǵy uıymnyń shottaryna aýdarǵan.
Alaıda mindettemeler oryndalmaǵan, mal jetkizý is júzinde júzege asyrylmaǵan. Alynǵan qarajat kúdikti tarapynan jeke qajettilikterine jumsalyp, onyń bir bóligi shetelge aýdarylyp, qolma-qol aqshaǵa aınaldyrylǵan. Keltirilgen jalpy shyǵyn kólemi 100 mln teńgeden asady, bul asa iri mólsherge jatady.
Tergeý barysynda kelisimsharttardyń jalǵan ekeni jáne kórsetilgen múliktiń joqtyǵy dáleldendi. Kúdiktiniń áreketteri asa iri kólemde jasalǵan alaıaqtyq retinde saralandy.
«Mundaı qylmystar kásipkerlik qyzmetke degen senimdi tómendetip, azamattarǵa aıtarlyqtaı zııan keltiredi. Alaıaqtyq shemalardy anyqtaý jáne olardyń jolyn kesý jumystary erekshe baqylaýda», dep atap ótti polısııa ókilderi.
Sot kúdiktini kináli dep tanyp, 5 jyl merzimge bas bostandyǵynan aıyrý jazasyn taǵaıyndady. Sonymen qatar osy merzimge jeke uıymdarda basshylyq qyzmet atqarý quqyǵynan aıyryldy. Sottalýshy sot zalynda qamaýǵa alyndy.
«Nesıeńizdiń mártebesi jańartyldy»: Ulttyq bank alaıaqtardyń jańa aılasy týraly eskertti
Polısııa azamattardy ınvestısııalyq jáne bıznes-jobalarǵa qatysý kezinde saq bolýǵa jáne qarjylyq sheshim qabyldar aldynda barlyq aqparatty muqııat tekserýge shaqyrdy.
