Foto: Aqorda
«Halyqaralyq Qyzyl krest komıteti dúnıe júzindegi gýmanıtarlyq yntymaqtastyq júıesinde asa mańyzdy ról atqarady. Halyqaralyq quqyq normalaryn nyǵaıtýǵa qosqan úlesińizdi joǵary baǵalaımyz. Siz basqaratyn Uıym men basqa da halyqaralyq bedeldi qurylymdar barshaǵa ortaq adamzat qundylyqtaryn nasıhattaýǵa eleýli úles qosyp keledi. Ásirese, bul is adamdar kómekke muqtaj aımaqtarda óte mańyzdy», dedi Prezıdent.
Qazaqstan Halyqaralyq gýmanıtarlyq quqyqqa saıası beıildilikti kúsheıtý jónindegi jahandyq bastama kótergen alty memlekettiń biri sanalady.
Bul rette soǵys kezindegi adamgershilik taqyryby boıynsha jyl sońyna qaraı Iordanııada ótetin joǵary deńgeıdegi Konferensııaǵa daıyndyq máseleleri pysyqtaldy.
Mırıana Spolıarıch Halyqaralyq Qyzyl krest komıtetiniń qyzmetine qoldaý kórsetkeni úshin Qazaqstan tarapyna rızashylyǵyn bildirdi. Onyń aıtýynsha, toqsanynshy jyldardan beri elimiz ben Uıym arasynda qalyptasqan syndarly dıalog dáıekti túrde damyp keledi.
«Memleketterdiń qoldaýy óte mańyzdy. Siz muny oryndy atap óttińiz. Jeneva konvensııasyna barsha el qatysady. Alaıda bul qujattyń yqpaly atalǵan normalardy memleketterdiń qanshalyqty qorǵap, qoldaýǵa ázirligine baılanysty», dedi HQKK basshysy.
Qasym-Jomart Toqaev pen Mırıana Spolıarıch halyqaralyq jáne gýmanıtarlyq kún tártibindegi ózekti máselelerdi talqylap, Qazaqstan men Uıym arasyndaǵy seriktestikti odan ári nyǵaıtýǵa múddeli ekenderin rastady.
Eske sala keteıik, buǵan deıin Qasym-Jomart Toqaev Irannyń ushqyshsyz ushý apparattary Nahchyvan qalasyndaǵy áýejaıdy atqylaýyna baılanysty ustanymyn málimdedi.
