Basqarma saıtynda osy jergilikti mańyzy bar joldardyń 1159,2 kılometri, ıaǵnı 23%-y ǵana asfalttalǵany kórsetilgen. 2150,9 km (42%) jolǵa qıyrshyqtas tóselgen. Al 1793,6 km jol(35%) – shańy shyqqan kádimgi qara jol.
Joǵaryda aıtylǵan sandardy túsinikti tilge aýdarsaq, oblystyq jáne aýdandyq mártebedegi avtojoldardyń ishinde jaqsy jáne qanaǵattanarlyq deńgeıdegi bóligi – 1429,04 km (28%). Al 72%-y, ıaǵnı 3674,67 km jol qanaǵattanarlyqsyz jaǵdaıda. Bul – resmı málimet.
Sońǵy jyldary óńirdegi avtokólik joldarynyń jóndelýi artqany ras. 2019 jyly «Nurly jol» baǵdarlamasy boıynsha oblysqa 34,7 mlrd teńge bólingen, sol arqyly jyl sońyna deıin óńirdegi qanaǵattanarlyq jol mólsherin 31%-ǵa jetkizý josparlanǵan.
Besjyldyq jospar
– О́ńirdiń ózekti máseleler ondyǵynda – jol máselesi birinshi orynda ekeni sózsiz! Bul – oblys ákimi Ǵalı Esqalıevtiń sózi.
Ákimniń aıtýynsha, sońǵy úsh jylda oblys boıynsha 1200 km jol jóndelgen. О́tken jyldyń ózinde 34 mlrd teńge ıgerilip, 452 km jol jóndeldi. Jaqsy jáne qanaǵattanarlyq kúıdegi joldar úlesi 26%-dan 28,7%-ǵa artty. 2019 jyly 500 km jol jóndeý josparlanyp, 30 mlrd teńgeden astam qarjy bólingen.
– Tuńǵysh Prezıdent – Elbasy N.Á.Nazarbaevtyń tapsyrmasyna sáıkes úsh aýdan ortalyǵyn oblyspen qosý jumystary bastalyp ta ketti. Bul týraly Memleket basshysy Q.Toqaev ta óńirde bolǵan jumys sapary kezinde atap ótken bolatyn. Bul baǵytta konkýrstyq jumystar aıaqtalyp, Jánibek – Saıhyn tas jolynyń qurylysy bastalady. Sondaı-aq Orynbor oblysyna deıingi 150 km joldy bastaımyz, – deıdi óńir basshysy.
О́ńirde qurylys jáne jol qurylysy boıynsha besjyldyq jospar qabyldandy. Ásirese aýdandardy ózara jalǵaıtyn joldardy jóndeý bastaldy. Mysaly, Aqjaıyq jáne Báıterek aýdandaryn qosatyn «Vechnyı – Bolshoı Chagan – Peremetnoe» joly jáne Qaztalov pen Tasqala aýdandaryn jaqyndata túsetin «Tasqala – Aqqýraı – Bolashaq» (97 km) joly salynýda. Sondaı-aq Shyńǵyrlaý men Qaratóbe aýdandaryn qosatyn «Shyńǵyrlaý – Lýbenka – Lebedevka» joly jáne Bórli men Syrym aýdandaryn qosatyn jol qurylysy júrýde. Bul jumystar jol ýaqytyn qysqartyp, eldi meken halqyna kásibin damytýǵa múmkindik beredi.
Jaıyqtyń Buqar beti jol kútedi
О́ńirdi Jaıyq ózeni qaq jaryp aǵady. О́zendi jaǵalaı ornalasqan eldi mekender úshin Jaıyq – bir jaǵynan tirshilik tiregi, sý kózi bolsa, ekinshi jaǵynan úlken kedergi. О́ıtkeni oblysta Oral qalasynan tómen qaraı Atyraý oblysynyń Inder kentine deıin birde-bir kópir joq. Bul – 325 shaqyrym jer. Sondyqtan ózenniń sol jaǵynda, Buqar bette ornalasqan Sarytoǵaı, Bazarsholan, Bazartóbe, Qaraýyltóbe, Esensaı, Kónekketken, Quraılysaı, Shaǵataı, Aqsoǵym sekildi iri aýyldyq okrýgterdiń halqy oblys ortalyǵymen qatysatyn 300 shaqyrym joldyń azabyn jıi kóredi.
Olar paıdalanatyn «Barbastaý – Aqjaıyq – Inder» avtojoly Keńes kezinen beri asfalt jabyndysyn kórmegen. Jol joqtyǵynyń kesirinen kúz, qys jáne kóktem aılarynda laısań kezde keıbir aýyldarǵa jol qatynasy múldem toqtap qalady. Bul jóninde «Egemen Qazaqstan» gazetiniń 18 shilde kúngi sanynda Birjan Kárimuly esimdi oqyrmanymyzdyń «20 myńǵa jýyq adamnyń azaby – jol» atty maqalasy jaryq kórgen bolatyn.
О́ńirde túrli dárejedegi joldardy jóndeý týraly jospar jıi qozǵalǵanymen, Jaıyqtyń sol jaǵalaýymen júretin ejelgi kúre joldyń jóndelýi kesheýildep tur. Joǵaryda aıtylǵan basqarma saıtynda: «Barbastaý – Aqjaıyq – Inder» avtojolynyń 43-93 km telimin qaıta jańǵyrtý boıynsha «jobalyq-smetalyq qujattamalaryn jasaqtaý josparlanýda» degen aqparat tur. Iаǵnı, jobalaýdyń ózi jobada tur.
Jaıyq ózeniniń sol jaǵyn jaǵalaı júretin, oblystyń Aqjaıyq eldi mekeni men Atyraý oblysynyń Inder kentin jalǵaıtyn greıderdi asfalttaý – óńirlik dárejede óte mańyzdy máseleniń biri. Osy joldyń nasharlyǵy kóptegen áleýmettik qıyndyqqa bastaý boldy. Bazarsholan aýylynda turatyn ustaz Toqjan Muqanova «Jol məselesi sheshimin tapsa, halyqtyń turaqtanýyna sebep bolar edi. Jastar aýylǵa kelýin azaıtty. Aýyl halqy qartaıyp bara jatyr» dep dabyl qaǵyp otyr. Bul – kóptiń tilegi.
Batys Qazaqstan oblysy
