Nur-Sultannyń ákimi Altaı Kólginovtiń aıtýynsha, qazirgi tańda elordanyń shet aýdandarynda 16 turǵyn úı alaby bar. Onda qala halqynyń tórten biri, ıaǵnı, 280 myńnan astam adam turady. Bul jerdegi turmys deńgeıi qalanyń ortalyǵynan tómen.
Ákimniń baıandamasynda aıtylǵandaı, 700 kósheniń úshten ekisiniń jaǵdaıy nashar, asfalt tóselmegen, jóndeýdi qajet etedi, jaryq tartylmaǵan, úılerge sý jetkizilmegen. Úılerdiń 90 paıyzy pesh jaǵady, bul qalanyń ekologııasyna da zııan, órt shyǵý qaýpin de kúsheıtedi.
– Nur Otan partııasynyń XVIII sezinde Elbasy elordanyń shet aımaqtaryn damytýdy tapsyrdy. Bıyl ınjenerlik jeliler, joldar men abattandyrýǵa 7,5 mlrd teńge bólindi. Ilınka aýylyn damytýǵa 2 mlrd 300 mln teńge bólindi. Elordanyń turǵyn úı alaptaryn damytýǵa Prezıdent Qasym-Jomart Toqaev erekshe kóńil bólip otyr. Memleket basshysy «ashyq memleket saıasaty» qaǵıdatyna kóshýdi tapsyrdy. Biz áriptesterimizben barlyq 16 turǵyn úı massıvine bardyq. Turǵyndarmen kezdesip, ózekti máselelerdi tyńdadyq, - dedi A.Kólginov.
Osy otyrysta aıtylǵandaı, elordany damytýdyń 5 jylǵa arnalǵan bekitilgen keshendi jospary bar. Jasalatyn jumystar 3 negizgi blokqa bólingen, ol: jol jáne ınjenerlik ınfraqurylym, áleýmettik nysandardyń tapshylyǵy jáne abattandyrý máseleleri. Qysqa merzimdi, orta merzimdi jáne uzaq merzimdi dep bólingen jumystar satylap júzege asyrylady.
