Jyl saıyn ótetin «Burabike Fest-2019» sportty-mýzykalyq festıvali eki bólimnen turady. Alǵashqy bóliminde kásibı jáne áýesqoı veloshabandozdar ózara jaryssa, ekinshi kezeńde qaıyrymdylyq aýksıony uıymdastyrylady.
Bıylǵy aýksıonda jas ánshi Dımash Qudaıbergenniń 17 jasynda úlken sahnaǵa kıip shyqqan kostıými satylymǵa qoıyldy. Kostıýmniń alǵashqy baǵasy 200 myń teńgeden bastalyp, nátıjesinde 600 myń teńgege satyldy.
Sondaı-aq aýksıonda qazaqstandyq kásibı boksshy Gennadıı Golovkınniń qoltańbasy qoıylǵan boks qolǵaby 1 mln 200 myń teńgege, taǵy bir boksshymyz Qanat Islamnyń qoltańbasy qoıylǵan bylǵary qolǵaby 50 myń teńgege jáne Olımpıada chempıony Bahtııar Artaevtyń qoltańbasy qoıylǵan qolǵaby 60 myń teńgege satyldy.
Odan bólek, sýda júzýshi Dmıtrıı Balandınniń júzý telpegi 40 myń teńgege satyldy. Eske sala ketsek, Býrabaıda «Burabike Fest-2019» sportty-mýzykalyq festıvali ótip jatyr. Odan túsken barlyq qarajat qaıyrymdylyqqa jumsalady.
