Darıǵa Nazarbaeva elimizdiń jaqyn dosy – Korol Abdalla II-niń Koroldiktiń qoǵamdyq-saıası ómirin reformalaý jónindegi qyzmeti, sondaı-aq halyqaralyq ózekti máselelerdegi syndarly ustanymy Qazaqstanda joǵary baǵalanatynyn atap ótti. «Korol Abdalla II jeti ret resmı jáne jeke saparlarmen Qazaqstanda jeti ret bolyp, Álemdik jáne dástúrli dinder lıderleriniń besinshi Sezine qatysty. Iordanııany damytý, bilim berý, densaýlyq salalaryn jańǵyrtý jolynda orasan zor qyzmet atqardy. Ony Taıaý Shyǵystaǵy eń ozyq saıasatker dep bilemin», - dedi Senat Basshysy.
Iordanııa Senatynyń Tóraǵasy Koroldiktegi jáne aımaqtaǵy syrtqy saıası jaǵdaılar, atap aıtqanda Taıaý Shyǵysta bolyp jatqan kúrdeli ahýal týraly jan-jaqty habardar etti. F.ál-Faıez Iordanııa ekonomıkasyna «arab kókteminiń» tıgizgen teris áseri týraly aıtty. Sırııadaǵy soǵys saldarynan elde 1 mıllıon 300 myń bosqyn júr, Iordanııa olarǵa 1,3 mlrd dollar jumsap keledi, al halyqaralyq qoǵamdastyq kórsetip otyrǵan qoldaý barlyq shyǵyndardyń úshten birine ǵana jetedi.
«Arab kókteminiń zardaby bárimizge keri áser etti. Bolashaqta mundaı jaǵdaılarǵa jol bermeý kerek», - dedi D.Nazarbaeva jáne Arab elderiniń basshylaryn máselelerdi birlese otyryp sheshýge shaqyrdy.
Darıǵa Nazarbaeva Taıaý Shyǵystaǵy jaǵdaıdy Eýrazııa medıa forýmynyń alańynda, sondaı-aq Álemdik jáne dástúrli dinder lıderleri Seziniń aıasynda talqylaýdy usyndy.
Saýda-ekonomıkalyq yntymaqtastyqty damytý týraly aıta kelip, Iordanııa Senatynyń Tóraǵasy qazaqstandyq Senat basshysyna Qazaqstan men Iordanııanyń 2007 jyldan beri jumys istep kele jatqan iskerlik keńesiniń qyzmeti álsiz ekenin jáne mardymdy nátıje bermeı otyrǵany týraly habarlady.
Kezdesý aıasynda sondaı-aq vızalyq tártipti lıberaldaý jáne eki el arasyndaǵy tikeleı áýe baǵytyn ashý Qazaqstan men Iordanııa arasyndaǵy týrızmdi damytýǵa yqpal etetini talqylandy.
