Vokzaldyń qasbeti – qalanyń áspeti

Jalpy, Qaraǵandy temirjol vokzaly jospar boıynsha jyldyń sońyna taman tolyqtaı ashylýy tıis bolatyn. Tapsyrys berýshiler men merdigerler kerýen saraı qaı­ta jańartylǵannan keıin sán-sal­tanaty boıynsha elimiz­degi eń úzdik vokzaldardyń biri bolady dep sen­dirgen. Mysaly, ǵımaratty árleý jumys­taryna zamanaýı mate­rıaldar, atap aıtqanda, tabıǵı tasqa uq­sas­tyǵy óte jaqyn travertın qolda­nyldy. Vokzaldyń úsh qabatty ja­ńa bóliginde  kassalar, kútý zaldary, medpýnkt, múmkindigi shekteýli adamdarǵa arnalǵan demalys bólmesi, ana men bala bólmesi, fýdkorttar men saýda dúńgirshekteri ornalas­ty. Jolaý­shylar perronǵa ústi jabyq jer ústi ótkelderi boıynsha túsetin bolady. Qury­lysshylar jylý jáne elektrmen qamtamasyz etý jelilerin tolyqtaı aýystyrdy. Ishki klımat-baqylaý jáne edendi jylytý júıeleri ornatylǵan. Sondaı-aq kerýen saraıdyń jolaýshylar ótkizý qabileti 2,5 ese artady dep jos­par­lanǵan. Bir sózben aıtqanda, vok­zaldyń kelýshiler úshin yńǵaıly, qaýip­siz ári keń bolýy basty maqsat etip qoıylǵan.

Mine, osyndaı aýqymdy jumys­tar atqarylyp jatqanda qoǵamnyń qyraǵy kóz ókilderi bireýge maıda-shúıde, al bireýge asa mańyzdy kem­shi­likti baıqap qaldy. Ol – jańǵyr­tylǵan vokzaldyń qasbetine qatysty áńgime edi.

Osydan bir aıdaı buryn «QTJ» UK» AQ fılıaly – «Qaraǵandy magıs­traldik jeli bólimi» vokzaldyq sharýashylyq jónindegi dırektordyń orynbasary О́mirtaı Sherııazdanov jańa­rtýdan keıin ǵımarat tarıhı arhıtektýralyq kelbetin jo­ǵalt­paıtyn bolady, vokzal qasbetiniń stıli ózgeriske ushyramaıdy, al ǵı­marat ishindegi biregeı órnektelgen japsyrmalar saqtaýly kúıinde qala­dy dep ýáde bergen edi. Alaıda jańar­ǵan, jasarǵan vokzaldyń qasbeti jaýapty qyzmetker aıtqandaı jáne jurt kútkendegideı bolmaı shyqty. Qas­bettiń tarıhı kelbetinen aıyrylyp, qaradúrsin bolyp shyqqanyna shydaı almaǵan biraz jurt áleýmettik jelide narazylyqtaryn bildirip, aıqaı-shý kóterdi.

Bul áńgime oblystyń jańadan taǵaıyndalǵan ákimi Jeńis Qasym­bekke de jetti. Al óńir basshysy bol­sa, temir jol vokzalyn qaıta jańǵyr­tý kezinde týyn­daǵan máseleni sheshý kerek dep sanaıdy.

– Turǵyndardy nysannyń syrt­qy kelbeti qyzyqtyrady – bul qa­la­nyń kórikti jerleriniń biri bol­ǵan. Biz Indýstrııa jáne ınfraqu­ry­lymdyq damý mınıstrligi men «Qazaqstan te­mir joly» UK AQ basshy­lyǵymen sóı­lestik. Joba bo­ıynsha vokzaldyń ótkizý qabiletiniń artýyna baılanysty ǵımarattyń aýdany keńeıtildi, bul ortalyq kireberistiń syrtqy qasbetine áser etti. QTJ basshylyǵy jóndeý ju­mys­tarynan keıin ǵımarattyń jańa qasbeti burynǵy tarıhı kelbetine barynsha uqsaı túsetinine sendirgen. Sondyqtan sońǵy kúnderi áleýmettik jelilerde turǵyndar kótergen máse­leler sheshilip, jańa ǵımaratta adam­dar­dyń jaılylyǵy úshin barlyq jaǵdaı jasalatyn bolady, – dedi ol.

Sonymen, endigi sóz merdigerde. Onyń búginde qurylysy aıaqtalyp qalǵan vokzal qasbetin qaıtip, qandaı jolmen burynǵy qalpyna keltiretini beı­málim. Máselen, Qaraǵandy qala­lyq sáýlet-qala qurylysy jónindegi keńestegi mamandardyń pikirin bilge­nimizde, olar ǵımarattyń syrty qap­tal­ǵan travertın tas materıalyna oıý-órnek salyp, bederli pishim berý ońaı sharýa emes ekenin aıtty. Ony sheber qoldar jasamasa, búginginiń stanogy dál osy tusta sharasyz kó­rinedi. Eger, merdiger qasbetti týra ta­rıhı qalpyna uqsatyp isteýge nıet bildirse, onda buǵan kóp ýaqyt jáne qyrýar qarjy kerek eken...

QARAǴANDY