«Nur Otan» qabyldaýyna elimizdiń túrli óńirleriniń turǵyndary elektrmen, sýmen jabdyqtaýmen qamtamasyz etýge, ınfraqurylymdy damytýǵa qatysty problemalarymen jáne basqa da máselelermen júgindi.
Kúmisjan Mıftahova Aqmola oblysy Selınograd aýdany Talapker kentiniń 14 myńnan astam turǵynynyń atynan atalǵan eldi mekendi elektrmen qamtamasyz etý máselesin kóterdi — kentte nebári 10 transformator qosalqy stansııasy jumys isteıdi, sonyń saldarynan energııamen qamtamasyz etýde problemalar týyndap otyr.
A. Mamın Energetıka mınıstrligine jáne Aqmola oblysynyń ákimdigine qysqa ýaqyt ishinde úzdiksiz elektrmen qamtamasyz etýmen ATEK balansyna barlyq elektrmen qamtý nysandaryn berý máselesin pysyqtaýdy, sondaı-aq tarıftegi aıyrmashylyqtardy azaıtýdy qarastyrýdy tapsyrdy.
Almaty oblysynyń Qarasaı aýdanynyń turǵyny Bazarkeldi Anısov qabyldaýǵa «Aqseńgir – Shamalǵan» temir jol ótpesinde kópir salý týraly ótinishimen júgindi.
«Kópir men jaıaý júrginshiler ótkeli salynyp, 2020 jyldyń sońyna deıin paıdalanýǵa beriledi», — dedi A. Mamın.
Premer-Mınıstr Indýstrııa jáne ınfraqurylymdyq damý mınıstrligine jáne Aqmola oblysynyń ákimdigine naqty tapsyrmalar berdi. Sonymen qatar jergilikti bılik oryndaryna turǵyndar men avtokólik quraldarynyń temir joldy kúndelikti ári qaýipsiz kesip ótýine baılanysty aǵymdaǵy máselelerdi sheshý tapsyryldy.
Almaty oblysy Eńbekshiqazaq aýdanynyń 330 turǵynynyń atynan partııa qabyldaýyna aýdandaǵy 11 kentte ortalyqtandyrylǵan sýmen qamtýdyń bolmaýy problemasyn sheshý ótinishimen Asyl Baıtýlaqov júgindi.
Úkimet basshysy qazirgi ýaqytta quny 4,5 mlrd teńge bolatyn toptyq sý tartqyshtaryn salý jobasy ázirlengenin aıtty, bul kelesi jyldyń sońyna deıin týyndap otyrǵan aýdandy sýmen qamtamasyz etý máselesin sheshýge múmkindik beredi.
Atyraý qalasynan kelgen kásipker О́temis Jumaǵalıev «Atyraý – Nur-Sultan» baǵyty boıynsha áýe bıletteriniń qunyn tómendetý týraly máseleni kóterdi.
A. Mamın QR Tuńǵysh Prezıdenti – Elbasy N. Nazarbaevtyń tapsyrmasyn oryndaý aıasynda áýe bıletteriniń qunyn tómendetý jáne básekelestikti kúsheıtý maqsatynda «FlyArystan» áýe kompanııasy qurylǵanyn aıtty, ol 2020 jyldyń mamyr aıynan bastap Atyraýǵa áýe reısterin oryndaýdy bastaıdy. Bul rette áýe bıletteri olardy aldyn ala satyp alǵan jaǵdaıda eń tómengi tarıf boıynsha satylatyn bolady (5-10 myń teńge). Sonymen qatar, kólik qatynasyn jaqsartý úshin «Atyraý – Aqtóbe» jáne «Atyraý – Astrahan» avtojoldary qaıta jóndeledi.
«Nur Otan» partııasynyń qoǵamdyq qabyldaýyna Shymkent qalasynyń 195-oramynyń (Badam) 3400 turǵynynyń atynan mektep muǵalimi Gúlnaz Ábdirova júgindi. Onyń aıtýynsha, aýdanda elektr berýde únemi irkilister bar.
Premer-Mınıstr Shymkent q. 195-oramynyń 828 úıin elektrmen jabdyqtaý úshin 244 mln teńge bólingenin aıtty. Jumystardy osy jyldyń jeltoqsan aıynda aıaqtaý kózdelgen. Sý qubyryn jáne gaz jelilerin salý kelesi jylǵa josparlanǵan.
Qaralǵan árbir júginý boıynsha Úkimet basshysy ákimdikterdiń, sondaı-aq mınıstrlikter men vedomstvolardyń basshylyǵyna naqty tapsyrmalar berip, azamattardy kóterilgen máselelerdiń sheshimi jeke baqylaýyna alynatynyna sendirdi.
Aldaǵy ýaqytta azamattardyń ótinimderine shuǵyl áreket etý maqsatynda QR Premer-Mınıstri Úkimet múshelerine «Nur Otan» partııasynyń qoǵamdyq qabyldaýlarynda halyqpen júıeli túrde kezdesýler ótkizýdi tapsyrdy.
