Kezdesý barysynda Elbasy eki el arasyndaǵy dostyq qatynastardy saqtaýdyń jáne odan ári damytýdyń mańyzdylyǵyn atap ótti.
– Bizdiń elge saparmen kelgenińizge qýanyshtymyn. Biz birge talaı qıyndyqtardan óttik. Osy jyldardyń ishinde bir-birimizden biraz nárse úırendik. Qazir álem aıtarlyqtaı ózgerip jatyr. Mundaı jaǵdaıda qol jetkizgen jetistikterdi saqtap qalý mańyzdy. Sizdi Belarýs Respýblıkasyna sińirgen barlyq eńbegińiz ben adamı qasıetterińiz úshin qurmetteımin. Sondaı-aq, Sizdiń senimdi dosyńyz bolyp qala beremin, - dedi Nursultan Nazarbaev.
О́z kezeginde, Aleksandr Lýkashenko Qazaqstannyń Tuńǵysh Prezıdentiniń óńirlik ıntegrasııalyq birlestikter aıasynda yntymaqtastyqty damytýdaǵy mańyzdy rólin atap ótti.
– Sizdi Joǵary Eýrazııalyq ekonomıkalyq keńestiń Qurmetti Tóraǵasy retinde Sankt-Peterbýrgte ótetin Keńes otyrysyna shaqyrý jóninde ortaq usynys tústi. Bul basqosýda aldaǵy perspektıvalardy aıqyndaımyz. Taǵdyr Qazaqstan, Belarýs pen Reseıge postkeńestik keńistiktegi osy ıntegrasııanyń ıadrosy bolýdy jazdy. Qazaqstan Siz arqyly árqashan osyndaı ıntegrasııanyń bastamashysy boldy. Sondyqtan jumysty osy qarqynmen jalǵastyrý kerek, - dedi Belarýs Respýblıkasynyń Prezıdenti.
