Betperde kıgen eki belgisiz tulǵa Tarazdaǵy ońaltý ortalyǵynan eki bas jylqyny urlap ketken. Jylqylardy damý múmkindikteri shekteýli balalarǵa arnalǵan ıppoterapııa emdeý kýrstaryn ótkizý kezinde qoǵamdyq birlestik mamandary paıdalanǵan.
Jambyldyq polıseılerdiń aldynda qylmyskerlerdiń zattaı dáleldemelerdi joıyp, ıaǵnı jylqylardy etke soıýyna nemese basqa óńirlerge satýyna jol bermeý úshin janýarlardy tez tabý mindeti turdy.
– Polısııa qyzmetkerleriniń kásibı jedel-izdestirý sharalarynyń nátıjesinde bir táýlik ishinde aýyr qylmys jasaǵan kúdiktiler anyqtalyp, ustaldy, jylqylar ońaltý ortalyǵyna qaıtaryldy, – dedi Jambyl oblysy Polısııa departamenti bastyǵynyń orynbasary, polısııa polkovnıgi Nurjan Qalmetov.
Taraz qalasynyń 22 jáne 23 jastaǵy eki turǵyny kinálaryn moıyndap, ýaqytsha ustaý ızolıatoryna qamaýǵa alyndy. Atalǵan derek boıynsha Qylmystyq kodekstiń 192-babynyń 2-bóligi boıynsha sotqa deıingi tergeý amaldary bastaldy (aldyn ala sóz baılasý arqyly jasaǵan qaraqshylyq).
«Asar» qoǵamdyq birlestigi tóraǵasynyń orynbasary Áıgerim Dáýletbaeva qylmysty jedel, qysqa merzimde ashqany úshin polısııa basshylyǵy men qyzmetkerlerine óz alǵysyn bildirdi. Eń bastysy, balalar sonshalyqty úırengen jylqylar qaıtarylyp, al ıppoterapııa sabaqtary jalǵasatyn bolady.
