Jaqynda, naqtyraq aıtsaq, 1-3 qarasha kúnderi Semeı qalasynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda jáne Abaı Qunanbaıulynyń 175 jyldyq mereıtoıy qarsańynda «Úrker» shyǵarmashylyq damytý ortalyǵynyń uıymdastyrýymen «Ulttyń uly murasy» atty halyqaralyq óner jáne bilim festıvali ótti.
Osy sharaǵa Semeı qalasyna qarasty shalǵaıdaǵy Qaınar aýylynyń jas ónerpazdary da qatysyp, kórermenniń qoshemetine bólendi.
Qaınar Mádenıet úıine qarasty «Meızek» úlgili balalar án-bı ansambliniń ánshisi Nargız Ásenova (jetekshisi - Torǵyn Qurmanǵojına) festıvaldiń qola júldegeri atansa, «Qaınar» halyq án-bı ansambliniń ánshisi Nurdáýlet Jeńisov (jetekshisi – Bısat Shaǵyrov) estrada-vokal kezeńinde án oryndaý sheberligimen kózge túsip, bas júldege ıe boldy.
Sonymen qatar Mádenıet úıi qyzmetkeri Bısat Shaǵyrov Abaı ánderin oryndap, kúmis júldeger atandy. Qatysýshylar demeýshilerdiń arnaıy syılyǵymen marapattalyp, jetekshileri «Úzdik jetekshi» marapatyna ıe boldy. 8 synyp oqýshysy Qaraqat Nurlanova 2-inshi dárejeli dıplommen marapattaldy.
Sondaı-aq, osy baıqaýdyń kórkemsóz bóliminde 5 synyp oqýshysy Asqarbek Saılaýǵalıev óleńderdi mánerlep oqyp, kúmis júldeni qanjyǵasyna baılady.
Taǵy bir jaǵymdy jańalyq, 30 qazan kúni Semeı qalasynda ótken kórnekti kompozıtor Temirjan Bazarbaev atyndaǵy I respýblıkalyq baıqaý-festıvaline Qaınardaǵy «Kókeıkesti» dombyrashylar ansambliniń dombyrashysy Ilııas Sembaev qatysyp, Qurmanǵazynyń kúıi «Serperdi» oryndap, I oryndy ıelendi.
Festıvalge qatysýshylar jolaı qasıetti meken Jıdebaıǵa at basyn buryp, ulylar rýhyna taǵzym etti.
Shyǵys Qazaqstan oblysy,
Semeı qalasy,
Qaınar aýyly
